ကေအဲန်ယူမွေးမြူရေးဇုန်တိုက်ပွဲမှာ တပ်ရင်းမှုးအပါအဝင် ထိခိုက်သေဆုံးဒဏ်ရာရတဲ့တပ်ဖွဲ့ဝင်တွေကို လာသယ်တဲ့ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA တို့အကြား မနေ့ညပိုင်းက ထိတွေ့ပစ်ခတ်မှုဖြစ်ပွားခဲ့ပြီး စစ်ကောင်စီဘက်က ၁ ဦးသေဆုံးခဲ့တယ်လို့ သတင်းရရှိပါတယ်။
မနေ့ ဒီဇင်ဘာ ၂၆ ရက်က ကော့ကရိတ်မြို့နယ် အာရှလမ်းမအနီးက ကေအဲန်ယူမွေးမြူရေးဇုန်မှာ KNLA တပ်မဟာ ၆ နဲ့ စစ်ကောင်စီတပ်တို့အကြား ထိတွေ့တိုက်ပွဲတွေဖြစ်ပွားခဲ့ပြီး စစ်ကောင်စီဘက်က တပ်ရင်းမှူးအပါအဝင် ၉ ဦးသေဆုံးခဲ့ကာ ၁၃ ဦး ဒဏ်ရာရရှိသွားခဲ့တာပါ။
ဒီလို ထိခိုက်သေဆုံးဒဏ်ရာရတဲ့ သူတွေကို သယ်ဖို့ လာတဲ့ အင်အား ၂၀ ခန့်နဲ့ ကား ၄ စီးပါဝင်တဲ့ စစ်ကောင်စီတပ်ဖွဲ့နဲ့ KNLA တပ်မဟာ ၆ တို့ဟာ မနေ့ည ၁၁ နာရီခွဲအချိန်က အာရှလမ်း ကော့နွဲ့တံတားထိပ်မှာ ထိတွေ့ပစ်ခတ်မှုဖြစ်ပွားခဲ့ပြီး စစ်ကောင်စီဘက်က ၁ ဦးသေဆုံးကာ ကားတစ်စီးလည်း ထိမှန်ပျက်စီးသွားခဲ့တယ်လို့ ကေအဲန်ယူသတင်းရင်းမြစ်ထံကနေ သိရပါတယ်။
ကော့ကရိတ်မြို့နယ် အာရှလမ်းမမှာ မနေ့က ဖြစ်ပွားခဲ့တဲ့ ကေအဲန်ယူမွေးမြူရေးဇုန်တိုက်ပွဲမှာ စစ်ကောင်စီဘက်က ထိခိုက်သေဆုံးဒဏ်ရာရတာတွေ များပြားနေလို့ စစ်ကောင်စီက လေကြောင်းပစ်ကူတွေကို ပထမဆုံးအကြိမ်အဖြစ် စတင်အသုံးပြုခဲ့တာလည်း ဖြစ်ပါတယ်။
Public Service Announcement
