လူသားများနွယ်စုအပေါ်ကျူးလွန်သည့်ရာဇဝတ်မှုများကြောင့် မင်းအောင်လှိုင်ခေါင်းဆောင်သည့် အကြမ်းဖက် စစ်ကောင်စီကို နိုင်ငံတကာရာဇဝတ်မှုခုံရုံး(ICC)၌ တရားစွဲရမည်ဟု အမေရိကန် မေရီလန်းချင်းအဖွဲ့အစည်း (SAM)က ယမန်နေ့(ဒီဇင်ဘာ ၃၀ရက်)တွင် ထုတ်ပြန်သည်။
ဒီဇင်ဘာ ၃၀ ရက်က ချင်းပြည်နယ် ထန်တလန်မြို့ရှိ ဘုရားကျောင်း Thantlang AG Church ကို မြန်မာ စစ်တပ်က မီးရှို့ခဲ့မှုနှင့်ပတ်သက်၍ SAM က ကြေညာချက်ထုတ်ပြန်ခဲ့ပြီး အဆိုပါ မီးရှို့ခဲ့မှုနှင့် ချင်းပြည်နယ်အတွင်း လူနေအိမ်များ၊ ဘုရားကျောင်းများကို ဆက်လက်မီးရှို့ဖျက်ဆီးနေမှုကို ပြင်းထန်စွာရှုတ်ချကြောင်း ယင်းကြေညာချက်၌ ဖော်ပြသည်။
ထို့အပြင် ဒီဇင်ဘာ ၂၄ရက်က ကယားပြည်နယ်၌ ကလေးငယ် ၄ ဦးနှင့် Save the Children ဝန်ထမ်း ၂ ဦး အပါအဝင် အရပ်သားပြည်သူအနည်းဆုံး ၃၅ ဦးကို မြန်မာစစ်တပ်က မီးရှို့သတ်ဖြတ်ခံခြင်းကိုလည်း SAM က ထုတ်ပြန်သည်။
ယင်းကဲ့သို့သော ရက်စက်ယုတ်မာမှုများကို ရပ်တန့်နိုင်ရေးအတွက် အမေရိကန်ဘိုင်ဒန်အစိုးရအဖွဲ့၊ နိုင်ငံတကာ အသိုင်းအဝန်း၊ အထူးသဖြင့် ကုလသမဂ္ဂလုံခြုံရေးကောင်စီတို့က မြန်မာစစ်တပ်ကို ပိုမိုဖိအားပေးရန် SAM က တိုက်တွန်းသည်။
Public Service Announcement
ပြည်တွင်းနေရပ်တိမ်းရှောင်သူများကို ကာကွယ်မှုပေးရန်နှင့် လူသားချင်းစာနာမှုအကူအညီပေးရန် ထန်တလန်နှင့် အခြားဒေသများသို့ ကုလသမဂ္ဂအေဂျင်စီများနှင့် နိုင်ငံတကာအသိုင်းအဝန်းက အမြန်ဆုံးဝင်ရောက်ခွင့်ရရှိရေး အတွက်လည်း SAM က တိုက်တွန်းသည်။
