ချင်းပြည်နယ် မတူပီ – ပလက်၀လမ်းပေါ်ရှိ ထယ်ဘွေး စစ်ကောင်စီတပ်စခန်းအား ဒုတိယအကြိမ် တိုက်ခိုက်မှုကို ယနေ့(ဇန်နဝါရီ ၄ရက်) နံနက် ၁၀နာရီခန့်မှ စတင်လုပ်ဆောင်နေကြောင်း မတူပီ CDFက သတင်းထုတ်ပြန်သည်။
ယမန်နေ့(ဇန်နဝါရီ ၃ရက်)တွင် အဆိုပါ ထယ်ဘွေးတပ်စခန်းကို CDF မတူပီက ဝင်ရောက်တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများခဲ့သည်။
“မနေ့က စစ်ကောင်စီဘက်က ငါးဦးကျတယ်။ ပြီးတော့ ၁၀ယောက်ကနေ ၁၅ယောက်အကြား ဒဏ်ရာရတယ်။ ကျွန်တော်တို့ဘက်က အထိအခိုက်မရှိဘူး။ ညနေပိုင်း ၆နာရီလောက်မှာ အင်အားအလုံးအရင်းနဲ့ မတူပီ ဟားခါး လမ်းဘက်ကို စစ်ကြောင်းချီလာတာကို ကျွန်တော်တို့ ဝင်ပစ်တာ အသေအပျောက်တော့ အတည်မပြုနိုင်ဘူး ဒါပေမဲ့ အရှင်နှစ်ယောက်ဖမ်းထားတယ်။ ဒီမနက်မှာလည်း ထပ်ဖြစ်တယ် ထယ်ဘွေးစခန်းမှာ”ဟု မတူပီ CDF ပြောရေးဆိုခွင့်ရှိသူတစ်ဦးက ပြောသည်။
ယနေ့ ထယ်ဘွေးစခန်း တိုက်ခိုက်မှုတွင် စစ်ကောင်စီတပ်မှ ထောင်ထားသည့် မြေမြှုပ်မိုင်းကြောင့် CDF တပ်ဖွဲ့ဝင် တစ်ဦး ဒဏ်ရာရရှိခဲ့သည်ဟု ၎င်းက ဆိုသည်။
“ဒဏ်ရာက အသက်အန္တရာယ်တော့ မစိုးရိမ်ရဘူး။ ဒါပေမဲ့ အခြေထောက်တော့ သိပ်အဆင်မပြေဘူး အခြေအနေမကောင်းဘူး”ဟု မတူပီ CDF ပြောရေး ဆိုခွင့်ရှိသူက ပြောသည်။
ထို့အပြင် တိုက်ပွဲသတင်းကို ဆက်လက်ထုတ်ပြန်သွားမည်ဟု မတူပီ CDFက အသိပေးထားသည်။
