အာဏာသိမ်းစစ်ကောင်စီတပ် နှင့် ဖြစ်ပွားသည့် တိုက်ပွဲအတွင်း စစ်ကောင်စီတပ်၏ လက်နက်ပစ္စည်းများ သိမ်းဆည်းရမိခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF) တပ်ရင်း(၁၀) ဒီးမော့ဆိုဇုန်က ယနေ့ သတင်းထုတ်ပြန်သည်။
အဆိုပါစစ်သုံးပစ္စည်းများကို မည်သည့်အချိန် မည်သည့် တိုက်ပွဲ၌ သိမ်းဆည်းရမိသည် ဆိုသည်ကို အသေးစိတ် ဖော်ပြမထားသော်လည်း ဒီဇင်ဘာ ၃၁ရက်မှစ၍ ဒီးမော့ဆိုမြို့နယ်တွင် စစ်ကောင်စီတပ်နှင့် ကရင်နီဒေသကာကွယ်ရေးပူးပေါင်းအဖွဲ့များ အကြား တိုက်ပွဲများ နေ့စဉ်လိုလို ဖြစ်ပွားလျက်ရှိသည်။
ဒီးမော့ဆိုတိုက်ပွဲအတွင်း နှစ်ဖက်ထိခိုက်ကျဆုံးမှုများရှိခဲ့ပြီး စစ်ကောင်စီတပ်က သေဆုံးသူများပြားပြီး ပိုမိုအထိနာခဲ့ကြောင်း KNDF၊ ပြည်သူ့ကာကွယ်ရေးတပ်ဖွဲ့(PDF) တပ်ဖွဲ့များ၏ သတင်းထုတ်ပြန်ချက်များအရ သိရသည်။
