မန္တလေးခရိုင်တရားရုံး မှာပေါက်ကွဲမှုဖြစ်ခဲ့ပြီးနောက် အဝင်အထွက်လုံခြုံရေးတင်းကြပ်ထား

မန္တလေးတိုင်း ၊ ချမ်းအေးသာစံမြို့နယ်အတွင်းရှိ မန္တလေးခရိုင်တရားရုံးမှာ ပြီးခဲ့တဲ့ ဒီဇင်ဘာလ ထဲက ပေါက်ကွဲမှု ဖြစ်ခဲ့ပြီးနောက် အဝင်အထွက်လုံခြုံရေးတင်းကြပ်စွာစစ်ဆေးနေတယ်လို့သိရပါတယ်။

ဒီဇင်ဘာလ ၂၇ရက်မနက်ပိုင်းက မန္တလေးခရိုင်တရားရုံးအဆောက်အအုံ ဒုတိယထပ်မှာ ပေါက်ကွဲမှုဖြစ်ခဲ့တာပါ။

အဲဒီနောက်မှာတော့ တရားရုံးကိုဝင်ထွက်တဲ့ ရှေ့နေတွေ ၊ အမှုသည်တွေကို ဝင်ထွက်ရာမှာ တင်းတင်းကြပ်ကြပ်စစ်ဆေးနေတယ်လို့ တရားရေးအသိုင်းအဝိုင်းမှ စုံစမ်းသိရပါတယ်။

ခရိုင်တရားရုံးကိုဝင်ထွက်မယ့် ရှေ့နေတွေရဲ့ ကိုယ်ရေးအချက်အလက်တွေ တောင်းယူသလို ရှေ့နေလိုင်စင်ထားခဲ့ရတာ ၊ အမှုသည်တွေဆိုရင်လည်း မှတ်ပုံတင်ထားခဲ့ရတာနဲ့ တရားရုံးကိုလာရောက်ရတဲ့အကြောင်း ရင်းကိုလည်း စစ်ကောင်စီတပ်ဖွဲ့ဝင်ကိုပြောပြနေရတယ်လို့ သိရပါတယ်။

Public Service Announcement

ဒါအပြင် အချိန်ကြာမြင့်စွာ အသေးစိတ်စစ်ဆေးမေးမြန်းခံရတာတွေလည်းရှိနေတယ်လို့ တရားရုံးကိုသွားခဲ့ရသူတစ်ဦးက ပြောပါတယ်။

မန္တလေးခရိုင်တရားရုံးကို စစ်တပ်နဲ့ရဲက လုံခြုံရေးယူပြီးစောင့်ကြည့်စစ်ဆေးတာတွေပြုလုပ်နေပါတယ်။

ဒီဇင်ဘာ၂၇ရက်က ပေါက်ကွဲမှုမှာတော့ တရားရုံးအဆောက်အအုံနေရာအချို့နဲ့ မှန်များကွဲပြီး လူထိခိုက်မှုတော့မရှိခဲ့ပါဘူး။