စစ်ကိုင်းတိုင်း၊ မုံရွာမြို့တွင် နေ့လယ်၁နာရီမှ ညနေ၆နာရီအထိ ကျန်းမာရေးကိစ္စမှလွဲ၍အပြင်မထွက်ကြရန် မြို့ပြပျောက်ကြားအဖွဲ့များက အသိပေးထားသည်။
မုံရွာမြို့နေ မိဘပြည်သူများအနေဖြင့် နေ့လယ် ၁ နာရီမှ ညနေ ၆ နာရီအတွင်း ကျန်းမာရေးကိစ္စမှအပ ပြင်ပသို့သွားလာခြင်းမပြုကြပါရန် အထူးမေတ္တာရပ်ခံကြောင်း ယနေ့(ဇန်နဝါရီ ၈ ရက်)တွင် Monywa The Boys၊ Monywa NightKing၊ Red Code Revolution နှင့်Monywa Ninjaအဖွဲ့တို့မှ ပူးပေါင်း ထုတ်ပြန်သည်။
စစ်ဆေးရေးဂိတ်အနီး တပ်ဆွဲထားသောနေရာများအနီးရှောင်သွားကြပါရန် Monywa NightKingက ထပ်မံသတိပေးသည်။
မုံရွာမြို့တွင် အကြမ်းဖက်စစ်ကောင်စီတပ်များသည် မြို့တွင်းနေရာအနှံ့တွင်လိုက်လံဖမ်းဆီးနှိပ်စက်မှုများပြုလုပ်နေပြီး ယနေ့နံနက်ပိုင်းကလည်း သာစည်လမ်း ပေ ၈၀ထိပ်တွင်လူငယ် ၁ဦးကို လက်ပြန်ကြိုးတုပ်ဖမ်းထားကြောင်း၊ ဖုန်းစစ်ရင်းအဖမ်းခံရသည်ဟု သိရကြောင်းဒေသခံတစ်ဦးက ပြောသည်။
ယမန်နေ့ညနေပိုင်းကလည်း ဗိုလ်ချုပ်ကြေးရုပ်တုအနီးတွင် ပစ်ခတ်သံများကြားလိုက်ရကာ လူတစ်ဦးလည်း ပစ်ခတ်ဖမ်းဆီးခြင်းခံလိုက်ရကြောင်း ဒေသခံများကပြောသည်။