လေးကေ့ကော်မြို့သစ် ဖလူးဒေသ၌ ယနေ့တိုက်ပွဲဖြစ်၊ စစ်ကောင်စီတပ်မှ တစ်ဦးသေ

ကရင်ပြည်နယ် မြ၀တီမြို့နယ် လေးကေ့ကော်မြို့သစ် ဖလူးဒေသ၌ ယနေ့ တိုက်ပွဲဖြစ်ပွားခဲ့ရာ စစ်ကောင်စီတပ်မှ တစ်ဦးသေဆုံးခဲ့ကြောင်း အဆိုပါဒေသရှိ ပြည်သူ့ကာကွယ်ရေးတပ်(PDF) စခန်းတစ်ခုမှ တာဝန်ရှိသူတစ်ဦးက ပြောသည်။

အာဏာသိမ်းစစ်ကောင်စီတပ်က ဖလူးဒေသသို့ စစ်ကြောင်းထိုးလာ၍ ကရင်အမျိုးသားအစည်းအရုံး(KNU) ဦးဆောင်သည့် ပူးပေါင်းတပ်ဖွဲ့က တိုက်ခိုက်ခဲ့ခြင်းဖြစ်သည်ဟု ဆိုသည်။

“မနက်က ၁၂နာရီ ပတ်ဝန်းကျင်လောက်က စပြီးတိုက်ပွဲဖြစ်တာ။ စစ်ကောင်စီတပ်ဘက်က စစ်ကြောင်း ထိုးတဲ့အချိန်မှာ ဖလူးမှာရှိတဲ့အဖွဲ့တွေနဲ့ဖြစ်ကြတာပေါ့။ ခုနက ၁နာရီခွဲလောက်အထိ လက်နက်ကြီးတွေနဲ့ ဆက်တိုက်ပစ်နေတယ်။ သူတို့ဘက်က တစ်ယောက်သေတယ်ပြောတယ်။ ဒီဘက်က အထိအခိုက်မရှိပါဘူး” ဟု PDF တပ်စခန်းတာဝန်ရှိသူ တစ်ဦးက ပြောသည်။

ပြီးခဲ့သည့် ဒီဇင်ဘာလလယ်ကစပြီး လေ့ကေ့ကော်ဒေသသို့ စစ်ကောင်စီတပ်များ ဝင်ရောက် အင်အား သုံးစီးနင်းခဲ့ခြင်းကြောင့် KNU ဦးဆောင်သည့် ပူးပေါင်းတပ်ဖွဲ့က ခုခံတိုက်ခိုက်ခဲ့ရာ တိုက်ပွဲများ ပြင်းထန်ခဲ့ပြီး စစ်ကောင်စီတပ်က လေကြောင်းတိုက်ခိုက်မှု၊ လက်နက်ကြီး အလွန်အကျွံပစ်ခတ်တိုက်ခိုက်မှုများ လုပ်ဆောင်ခဲ့ သည်။ ထို့ကြောင့် ဒေသခံ တစ်သောင်းကျော် စစ်ဘေးတိမ်းရှောင်ခဲ့ကြရသည်။

Public Service Announcement

လက်ရှိ လေးကေ့ကော်ဒေသ စစ်ရေးအခြေအနေမှာ မကြာခဏ ထိတွေ့တိုက်ပွဲဖြစ်ပွားနေသော်လည်း တိုက်ပွဲကြီးများ ဖြစ်ပွားမှုမရှိဟု ဆိုသည်။