လက်နက်ချ၍ ပူးပေါင်းဆောင်ရွက်ခြင်းမရှိပါက ချေမှုန်းသွားမည်ဟု သတိပေး
စစ်ကိုင်းတိုင်း အရာတော်မြို့နယ် ငွေတွင်းကျေးရွာမှ ပျူစောထီးများ၏အမည်စာရင်းကို အရာတော်မြို့နယ်တော်လှန်ရေးအင်အားစု(ARA)က ယနေ့(ဇန်နဝါရီ ၂၀ ရက်)တွင် ထုတ်ပြန်သည်။
အရာတော်မြို့နယ် တော်လှန်ရေးအင်အားစုသည် ပျူစောထီးများအား မိမိတို့နည်းတူ အဖိနှိပ်ခံပြည်သူဖြစ်လင့်ကစား ဘာသာရေး၊ လူမျိုးရေးမှိုင်းတိုက်ခံရသော စစ်တပ်၏ အသေခံ၊အသုံးချခံ ရန်သူ့လက်ကိုင်တုတ်များအဖြစ် ရှု့မြင်ကြောင်း အသိပေးသည်။
အကြမ်းဖက်စစ်ကောင်စီလက်အောက်ခံ ဒလံ၊ ပျူစောထီးများကို စောင့်ကြည့်အတည်ပြုခြင်း ၊သတိပေးခြင်း၊လိုက်နာပူးပေါင်းရန်ဆောင်ရွက်ခြင်းစသည့် အဆင့်များဖြင့် လုပ်ဆောင်မည်ဖြစ်ပြီး လက်နက်ချ၍ ပူးပေါင်းဆောင်ရွက်ခြင်းမရှိပါက ရန်သူစစ်ကောင်စီနှင့် တတန်းတည်းထား၍ ချေမှုန်းသွားမည်ဟု ARA က သတိပေးသည်။
ယခု ထုတ်ပြန်သည့် ပျူစောထီး ၄၄ ဦးသည် ငွေတွင်းကျေးရွာမှ ဖြစ်ပြီးသတိပေးခြင်းအဆင့်ကို ကျော်လွန်ခဲ့ပြီဖြစ်ကြောင်းလည်း ARA က ဆိုသည်။
“အခုက လက်နက်ကိုင်နေတဲ့ ပျူစောထီးစာရင်းပါ။ နောက်ပြီး စစ်ခွေးတွေကို ထောက်ခံတဲ့ငွေတွင်းရွာက အမာခံဘောမစာရင်းရော၊ ကားတွေရိက္ခာတွေ ကူပေးနေတဲ့လုပ်ငန်းရှင်စာရင်းရော ရထားပြီးဖြစ်တယ်”ဟု ARA မှ ဗိုလ်ပေါက်စီက လူထုနွေဦးသို့ ပြောသည်။
ထို့ကြောင့် အဆိုပါ ပျူစောထီး ၄၄ ဦးသည် အကြမ်းဖက်စစ်ကောင်စီ၏ လက်ကိုင်တုတ်အဖြစ် မပတ်သက်တော့ပါကြောင်း ဝန်ခံကတိပြုပြီး နီးစပ်ရာတော်လှန်ရေးအဖွဲ့အစည်းထံတွင် လက်နက်ချရမည်ဟု ထပ်လောင်း သတိပေးသည်။
လက်နက်ချပြီး မိမိအန္တရာယ်အတွက် ရွာမှ ထွက်ခွာလိုပါက ထွက်ခွာမည့်နေရာအားတော်လှန်ရေးအင်အားစုသို့ ဆက်သွယ်အကြောင်းကြားရမည် ဟု အသိပေးသည်။
အရာတော်မြို့နယ်ရှိ ကျေးရွာအချို့သည် မဘသ နှင့် ပြည်ခိုင်ဖြိုးပါတီဝင်အချို့သည် ပျူစောထီး အမည်ခံကာ အကြမ်းဖက်စစ်ကောင်စီတပ် နှင့် ပူးပေါင်းကာ ပြည်သူလူထုထံမှ အခွန် အကောက်များ အဓမ္မ တောင်းယူမှုများအပြင် နှိပ်စက်သတ်ဖြတ်မှု အချို့ ပြုလုပ်နေကြောင်းလည်း ဒေသခံများက ပြောကြားထားသည်။
ထို့ကြောင့် အရာတော်မြို့နယ် သလဲဘာကျေးရွာ မှ ပျူစောထီးများကို နိုဝင်ဘာလအတွင်းက ARA က ဝင်ရောက်တိုက်ခိုက်ခဲ့ပြီး ပျူစောထီးခေါင်းဆောင်း တောင်ကြီး ဆိုသူမှာထွက် ပြေးခဲ့ရကာ ၎င်းနောက်လိုက် ခြောက်ဦး သေဆုံးခဲ့ရသည်။