လားရှိုးမြို့နယ် မိုင်းယော်ဒေသတွင် မြောက်ပိုင်းညီနောင်မဟာမိတ်သုံးဖွဲ့နှင့် စစ်ကောင်စီတပ်တို့ ယနေ့ တိုက်ပွဲပြင်းထန်ခဲ့ကြောင်း ရှမ်းမြောက်ဒေသခံတစ်ဦးက ပြောသည်။
ကိုးကန့်လက်နက်ကိုင်တပ်ဖွဲ့(MNDAA)နှင့် စစ်ကောင်စီတပ်တို့အကြား ရှမ်းမြောက် မုံးကိုး၊ သိန္နီ၊ ကွတ်ခိုင်နှင့် လားရှိုး ဒေသများ၌ တိုက်ပွဲများ မကြာခဏ ဖြစ်ပွားနေပြီး ယနေ့တွင် MNDAA၊ တအာင်းအဖွဲ့(TNLA)နှင့် ရခိုင်အဖွဲ့(AA) ပူးပေါင်းပြီး စစ်ကောင်စီကို တိုက်ခိုက်လာခြင်းဖြစ်သည်။
“တိုက်ပွဲက ဖြစ်တာတော့ဖြစ်နေတယ်။ ပြေးနေရတဲ့သူက ဖုန်းဆက်လာတယ်။ လေယာဉ်က ဒီညနေမှာ ပျံသွားတယ်ပြောတယ်။ စစဖြစ်တာက AAနဲ့ ဖြစ်တယ်လို့ပြောတယ်။ အရင်က AAနဲ့ ဖြစ်ခဲ့တဲ့နေရာပေါ့။ မိုင်းယော်ဘက်မှာ စစ်ကောင်စီက ထိုးတက်လာတော့ ဖြစ်တာ။ ဖြစ်တော့ ကိုးကန့်အဖွဲ့ကလည်း လာကူတယ်၊ TNLA အဖွဲ့ကလည်း လာတော့ သုံးဖွဲ့ပေါင်းပြီးဖြစ်တာပေါ့” ဟု ရှမ်းမြောက်ဒေသခံက ပြောသည်။
အသေးစိတ်အခြေအနေကို မသိရသော်လည်း ယနေ့ တစ်နေ့လုံး တိုက်ပွဲပြင်းထန်နေသည်ဟု ကြားရကြောင်း ၎င်းက ဆိုသည်။
ရှမ်းမြောက် ကွတ်ခိုင်မြို့နယ် ကုန်းဆာရွာတွင်လည်း ဇန်နဝါရီ ၂၈ရက် နေ့လည်ပိုင်းမှစ၍ MNDAAနှင့် စစ်ကောင်စီတပ်တို့ တိုက်ပွဲပြင်းထန်နေကြောင်း ဒေသခံကို ကိုးကားပြီး ရွှေဖီမြေသတင်းဌာနက ဖော်ပြထားသည်။ ယမန်နေ့ ဇန်နဝါရီ ၂၇ရက်ကလည်း ပန်ဆေးနှင့် ကုန်းဆာရွာကြားတွှင်လည်း MNDAAနှင့် စစ်ကောင်စီတပ်တို့ တိုက်ပွဲဖြစ်ခဲ့သည်ဟု ဆိုသည်။