အပြည်ပြည်ဆိုင်ရာတရားရုံး(ICJ) အတွက် ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုး ထွန်းကို နိုင်ငံကိုယ်စားပြုကိုယ်စားလှယ်အဖြစ် လက်ခံပေးရန် အမျိုးသားညီညွတ်ရေးအစိုးရ (NUG)က ယနေ့(ဖေဖော်ဝါရီ ၁ ရက်) ထုတ်ပြန်တောင်းဆိုသည်။
မြန်မာနိုင်ငံ၏ တရားရုံးဆိုင်ရာ ကိုယ်စားလှယ်(agent) နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် ကိုယ်ခွဲကိုယ်စားလှယ်(alternate agent)တို့ကို စစ်တပ်က တရားဥပဒေနှင့် မညီဘဲ ဖမ်းဆီးထိန်းသိမ်းထားသဖြင့် ကုလသမဂ္ဂဆိုင်ရာ သံအမတ်ကြီး ဦးကျော်မိုးထွန်းက မြန်မာကိုယ်စားပြုဆောင်ရွက်နိုင်သည့်ကိုယ်စားလှယ်(acting alternate agent)ဖြစ်ကြောင်း ICJကို NUG က အသိပေးထားသည်ဟု ဆိုသည်။
ထို့အပြင် NUG သည် သံအမတ်ကြီး ဦးကျော်မိုးထွန်းမှတဆင့် မြန်မာနိုင်ငံအနေဖြင့် ကနဦးကန့်ကွက်ချက် (preliminary objection)အား ပြန်လည်ရုတ်သိမ်းပြီး တရားရုံး၏ တရားစီရင်မှု အခွင့်အာဏာကို လက်ခံကြောင်း တရားရုံးသို့ အကြောင်းပြန်ခဲ့ပြီး ဖြစ်သည်ဟု ထုတ်ပြန်သည်။
အဆိုပါ ကန့်ကွက်ချက်များသည် လုပ်ထုံးလုပ်နည်းဆိုင်ရာ ကိစ္စရပ်များသာဖြစ်ပြီး အမှု၏ အကြောင်းအရာနှင့် သက်ဆိုင်မှုရှိသည်ဟု မဆိုနိုင်ကြောင်း NUG က ရှင်းပြသည်။
Public Service Announcement
NUG ၏ အထက်ပါသဘောထားမှုကြောင့် တရားရုံးသည် လာမည့်ကြားနာစစ်ဆေးမှုကို ဖျက်သိမ်းပြီး ကုလသမဂ္ဂအထွေထွေ ညီလာခံ၏ ဆုံးဖြတ်ချက်များကို ချိုးဖောက်နေသော စစ်တပ်အား တဖက်သတ်အသိအမှတ် ပြုရာရောက်မည်မဟုတ်ပေ။
ICJ အနေဖြင့် အကြမ်းဖက်စစ်တပ်ကို မြန်မာနိုင်ငံ၏ ကိုယ်စားလှယ်အနေဖြင့် လက်ခံမည်ဆိုပါက ကုလသမဂ္ဂ အထွေထွေညီလာခံ၏ ရပ်တည်ချက်သဘောထားများနှင့် ညီညွတ်မှုမရှိဘဲ အန္တရာယ်ရှိသော အစဉ်အလာ တစ်ရပ်ကို ချမှတ်ပေးသကဲ့သို့ ဖြစ်နိုင်ကြောင်း NUG က ထောက်ပြ သည်။
ဗျူရိုကရေစီယန္တရား၏ မဖြစ်သင့်သော လွဲမှားဆောင်ရွက်မှုကြောင့် အပြည်ပြည်ဆိုင်ရာ တရားရုံးသည် စစ်တပ်ကထိန်းချုပ်ထားသော တရားမဝင်သည့် ဘရပ်ဆယ်လ်မြို့ရှိ သံရုံးနှင့် ဆက်သွယ်ဆောင်ရွက်နေသည်ဟုလည်း NUG က ဆိုသည်။
ယင်းသို့ပြုမှုဆောင်ရွက်ခြင်းကြောင့် နိုင်ငံတကာရာဇဝတ်မှု ဆိုင်ရာ တာဝန်ခံမှုအတွက် ကြိုးပမ်းအားထုတ်မှုများကိုလည်း နှောင့်နှေးကြန့်ကြာစေမည်ကို စိုးရိမ်မိပြီး ထိုသို့ဖြစ်လာမည်ဆိုပါက မြန်မာပြည်သူအားလုံးနှင့် လက်ရှိ တရားစီရင်မှုနှင့် သက်ဆိုင်သူအားလုံး၏ အကျိုးစီးပွားကို ထိခိုက်စေမည်ဖြစ်ကြောင်း NUG က သတိပေးသည်။
ဂမ်ဘီယာက မြန်မာကို လူမျိုးတုံးသတ်ဖြတ်မှုဆိုင်ရာ တားမြစ်ချက်များကို ချိုးဖောက်သည်ဆိုကာတရားစွဲဆိုထားသော အမှုနှင့်ပတ်သက်၍ လာမည့် ဖေဖော်ဝါရီ ၂၁ မှ ၂၈ အထိ နှုတ်ဖြင့် ဒုတိယအကြိမ်ကြားနာမှုများ ပြုလုပ်မည်ဟု ICJ က ထုတ်ပြန်ထားသည်။
