ရန်ကုန်တိုင်း သန်လျင်မြို့တွင် ယမန်နေ့ညနေပိုင်းက အသံတိတ်သပိတ်အပြီး ဗဟိုကျောင်းအနီး၌ စစ်ဆေးနေသော အကြမ်းဖက်စစ်ကောင်စီတပ်သားများက အပြစ်မဲ့ပြည်သူလူငယ်တစ်ဦးကို အကြောင်းမဲ့ပစ်သတ်ခဲ့ကြောင်း သန်လျင်မြို့ခံတစ်ဦးက ပြောသည်။
ဖေဖော်ဝါရီ ၁ ရက် ည၈နာရီကျော်တွင် သန်လျင်ဈေးနာရီစင်ဘက်မှ ဆိုင်ကယ်မောင်းနင်လာသည့် အမျိုးသားကို လမ်းသွား၊ လမ်းလာများအား စစ်ဆေးနေသည့် အကြမ်းဖက်စစ်ကောင်စီတပ်ဖွဲ့ဝင်များက သေနတ်ဖြင့် ၇ ချက်ခန့်ပစ်ခဲ့ကြောင်း ၎င်းက ဆိုသည်။
“ဗိုက်တစ်ချက်၊ နားထင်ကိုတစ်ချက်ထိမှန်ပြီး အခင်းဖြစ်ပွားတဲ့နေရာမှပဲသေဆုံးခဲ့ပါတယ် “ဟု၎င်းက ဆက်ပြောသည်။
အဆိုပါနေရာ၌ အကြမ်းဖက်စစ်ကောင်စီတပ်များက စစ်ဆေးမှုများပြုလုပ်လေ့ရှိပြီး ဖေဖော်ဝါရီ ၁ ရက်စစ်ဆေးမှုတွင် ဆိုင်ကယ်စီးလာသူအချို့ကို အင်္ကျီများချွတ်၍ စစ်ဆေးသည်အထိ ပြုလုပ်ခဲ့ကြောင်းလည်း ၎င်းက ဆိုသည်။
Public Service Announcement
“ဒီနေ့ Silent Strike က သန်လျင်မှာ တော်တော်အောင်မြင်ခဲ့တာဗျ၊ အဲဒီလိုအောင်မြင်တော့ ညနေ့ပိုင်းကျတော့ ပြည်သူ့တွေပြန်ထွက်တော့ ခွေးတွေက မတရားအညိုးထားနေတာဗျာ။ အကြောင်းမဲ့သပ်သပ်ပစ်သတ်တာဗျာ “ဟု အထက်ပါမြို့ခံက ပြောသည်။
သေနတ်ဖြင့် အပစ်ခံရသူသည် အသက်(၃၂)နှစ်အရွယ်ဖြစ်ပြီး ၎င်းနေထိုင်သည့် လမ်းထဲ၌ ပစ်သတ် ခံခဲ့ရ ခြင်းဖြစ်သည်။ အကြမ်းဖက်စစ်ကောင်စီတပ်ဖွဲ့ဝင်များက အခင်းဖြစ်သည့်နေရာ၌ ၎င်းတို့ပစ်ခဲ့သည့် ကျည်ခွံများကို ရှာဖွေခဲ့ကြောင်းနှင့် သေဆုံးသူကို သန်လျင်ဆေးရုံသို့သယ်ဆောင်သွားကြောင်း ၎င်းကပြောသည်။
