NUG က နိုင်ငံလေးနိုင်ငံတွင် ကိုယ်စားလှယ်များ ခန့်အပ်ထားပြီဖြစ်
အမျိုးသားညီညွတ်ရေးအစိုးရ(NUG) နှင့်ဂျပန်နိုင်ငံအကြား ဆက်ဆံရေးတိုးမြှင့်ဆောင်ရွက်နိုင် ရေးအတွက် ဂျပန်နိုင်ငံဆိုင်ရာကိုယ်စားလှယ်အဖြစ် စောဘလှသိန်းကို ခန့်အပ်ကြောင်း NUG နိုင်ငံခြားရေးဝန်ကြီးဌာနက ဖေဖော်ဝါရီ ၁ ရက်တွင် ထုတ်ပြန်သည်။
NUG နိုင်ငံခြားရေးဝန်ကြီးဌာနသည် ဂျပန်နှင့် ဆက်ဆံရေးတိုးမြှင့်ဆောင်ရွက်နိုင်ရန်၊ ဂျပန်ရောက်မြန်မာနိုင်ငံသားများပူးပေါင်းဆောင်ရွက်နိုင်ကြစေရန်၊ ဂျပန်ရောက်မြန်မာနိုင်ငံသားများ တွေ့ကြုံနေရသော အခက်အခဲများကိုကူညီဖြေရှင်းနိုင်ရန်ရည်ရွယ်၍ စောဘလှသိန်းကို ဂျပန်နိုင်ငံဆိုင်ရာ ကိုယ်စားလှယ်အဖြစ်ခန့်အပ်တာဝန်ပေးအပ်ခြင်းဖြစ်သည်ဟု ဆိုသည်။
စောဘလှသိန်း သည် Karen National League (Japan) K.N.L, Karen Information Space (Japan) K.I.S, Karen National Foundation (Japan) K.N.F, Association of United Nationalities in Japan (AUN), Refugees Coordination Committee Japan (RCCJ), စသည့် အဖွဲ့အစည်းများကို တည်ထောင်ခဲ့သူဖြစ်ပြီး လက်ရှိအချိန်တွင်လည်း ဂျပန်နိုင်ငံတွင် မြန်မာ့အရေးကို တက်ကြွစွာဆောင်ရွက်နေသူဖြစ်ကြောင်း NUG နိုင်ငံခြားရေးဝန်ကြီးဌာနက ထုတ်ပြန်သည်။
NUG နိုင်ငံခြားရေးဝန်ကြီးဌာနသည် ဩစတြေးလျ၊ ချက်သမ္မတနိုင်ငံ၊ တောင်ကိုရီးယားတို့တွင် ၎င်းတို့၏ ကိုယ်စားလှယ်များကို ခန့်အပ်တာဝန်ပေးထားပြီးဖြစ်သည်။