မုဒုံမှရေးသို့ အင်အားလာဖြည့်သည့် စစ်ကောင် စီတပ်ယာဥ်တန်းတိုက်ခိုက်ခံရကားသုံးစီးပျက်စီး ထိခိုက်သေဆုံးရှိနိုင်

မုဒုံနယ်မှနေ၍ ရေးမြို့ဘက် အင်အားလာဖြည့်သည့် စစ်ကောင်စီယာဥ်တန်းအား ဖောက်ခွဲပစ်ခိုက်တိုက်ခိုက်ခဲ့ကြောင်း မြို့ပြပြောက်ကျား တပ်ဖွဲ့ Ye Guerrilla Force(YGF)က ယနေ့ (ဖေဖော်ဝါရီ ၃)ထုတ်ပြန်သည်။

“တဖက်ကကောင်တွေ ၁ နာရီလောက်အချိန် မုဒုံကနေထွက်လာပြီလို့ သိရတော့ကျွန်တော်တို့လမ်းမှာအသင့်ပြင်ပြီးသွားစောင့်နေပါတယ်။ ည ၁၀ နာရီ မှ ဆင်းလာပြီဆိုပြီးသတင်းရတော့ ကျွန်တော်တို့ မိုင်းခွဲပြီး လက် နက်ငယ်နဲ့ ပစ်ခတ်ခဲ့ပါတယ်”ဟု YGF တပ်မှ ရဲဘော်တစ်ဦးက People’s Spring သို့ ပြောသည်။

တိုက်ခိုက်ခံရသော စစ်ကောင်စီယာဥ်တန်းတွင် စစ်ကား ၅ စီးပါဝင်ပြီး တိုက်ခိုက်မှုကြောင်း ကား ၃ စီးပျက်စီးပြီးထိုးရပ်သွားစဥ် လက် နက်ငယ်များဖြင့် ထပ်မံပစ်ခတ်တိုက်ခိုက်ခဲ့ကြောင်း ၎င်းကဆက်ပြောသည်။

အဆိုပါ စစ်ကောင်စီတပ်ဖွဲ့ဝင်များသည် ယမန်နေ့နံနက်ပိုင်းက ရေးမြို့နယ် အစင်ကျေးရွာအုပ်ချုပ်ရေးမှူးနှင့် စစ်ကောင်စီလက်ပါးစေတစ်ဦး ရှင်းလင်းခံရသဖြင့် ရေးမြို့နယ်သို့ လာရောက်အင်အားဖြည့်တင်းခြင်းဖြစ်ကြောင်း YGF က ဆိုသည်။

Public Service Announcement

ရေးသို့ အင်အားလာရောက်ဖြည့်တင်းသော စစ်ကောင်စီတပ်ဘက်မှ ကား ၃ စီးပျက်ဆီးသွားသည့်အပြင် ထိခိုက်သေဆုံးမှုများလည်း ရှိနိုင်ကြောင်း YGF ထံမှ သိရသည်။