ရန်ကုန်မြို့ လှိုင်သာယာမြို့နယ်တွင် ကင်းလှည့်နေသည့် အာဏာသိမ်းစစ်ကောင်စီတပ်ကား သုံးစီးကို မြို့ပြပျောက်ကြားတပ်ဖွဲ့များက ယနေ့ (ဖေဖော်ဝါရီ ၄ ရက်) ညနေပိုင်းတွင် ဗုံးခွဲတိုက်ခိုက်ခဲ့ရာ စစ်ကောင်စီဝင်အချို့ ထိခိုက်ဒဏ်ရာ ရရှိဖွယ်ရှိကြောင်း From Zero To Hero (ZTH) က ထုတ်ပြန်သည်။
ယနေ့ ညနေ ၄ နာရီခွဲ ဝန်းကျင်တွင် လှိုင်သာယာမြို့နယ် အောက်ထိပ်မှတ်တိုင်အနီးတွင် ကင်းလှည့်လာသော စစ်ကား သုံးစီးကို From Zero To Hero (ZTH) နှင့် Spring Revolution Flames (SRF) မြို့ပြပြောက်ကျားတော်လှန်ရေးအဖွဲ့မှ ပူးပေါင်းတိုက်ခိုက်ခဲ့ကြောင်း ထုတ်ပြန်ချက်တွင်ဖော်ပြထားသည်။
အဆိုပါ စစ်ကားလာမယ့်လမ်းကြောင်းကို ဗုံး သုံးလုံး ကြိုတင်စီစဉ်ပြီး ဖောက်ခွဲခဲ့ကာ ယင်းပေါက်ကွဲမှုကြောင့် စစ်ကားနောက်ဆုံးတစ်စီးမှာ ပိုမိုထိမှန်ခဲ့ပြီး အကြမ်းဖက် စစ်ကောင်စီဝင်များ အထိအခိုက်ရှိခဲ့ကြောင်း လည်းပါရှိသည်။
” မီးခွက်ဈေးအောက်ထိပ်မှာ ညနေက စစ်ကား ဗုံးခွဲခံရတာပါ။ အခု ၆ နာရီလောက်ထိ မီးခွက်စျေး အနီးတစ်ဝိုက်ကို စစ်သားတွေ ပိတ်ပြီး စစ်နေကြတယ်။ အရပ်ဝတ်တွေလဲ အများကြီးပဲ။ လူနာတင်ကားတွေ သွားနေတာလည်း တွေ့ရတယ်။ စစ်သားတွေ ထိခိုက်မှု ရှိတယ် ထင်ပါတယ်။ လမ်းပိတ်ထားတော့ သေချာတော့ မမြင်ရပါဘူး ” ဟုလှိုင်သာယာမြို့နယ်နေ ပြည်သူတစ်ဦးက ပြောသည်။
Public Service Announcement
ယင်းတိုက်ခိုက်မှုအပြီး တော်လှန်ရေး ရဲဘော်များ ဘေးကင်းလုံခြုံရာသို့ ရောက်ရှိနေပြီ ဖြစ်ကြောင်းနှင့် ယခုထက် ပိုမို၍ တော်လှန်ရေး အရှိန်အဟုန်မြှင့်လုပ်ဆောင်သွားမည် ဖြစ်ကြောင်းလည်း ထုတ်ပြန်သည်။
ပေါက်ကွဲမှုအပြီးနောက် အကြမ်းဖက် စစ်ကောင်စီဝင် အများအပြား ရောက်ရှိလာပြီး လှိုင်သာယာ၊ မီးခွက်ဈေးအောက်ထိပ်၌ လမ်းများပိတ်ဆို့ထားကြောင်း ဒေသခံများက ပြောသည်။
