စစ်ကောင်စီတပ်သား ၃၀ခန့်ထိခိုက်ဒဏ်ရာရရှိကြောင်း သထုံပြည်သူ့ ပြောက်ကျားများ ထုတ်ပြန်
ရန်ကုန်-မော်လမြိုင်ကားလမ်း(အာရှလမ်းမကြီး)ပေါ်၌အကြမ်းဖက်စစ်ကောင်စီ ယာဥ်တန်းကို ကရင်အမျိုးသားလွတ်မြောက်ရေးတပ်မတော်(KNLA)နှင့် သထုံပြည်သူ့ပြောက်ကျားအဖွဲ့ ပူးပေါင်းတိုက်ခိုက်ရာ ကားလေးစီးပျက်စီးပြီး စစ်ကောင်စီတပ်သား ၃၀ခန့်ထိခိုက်ဒဏ်ရာ ရရှိကြောင်း သထုံပြည်သူ့ ပြောက်ကျားများ(TPG)က ယနေ့(ဖေဖော်ဝါရီ ၈ ရက်)တွင် ထုတ်ပြန် သည်။
တိုက်ပွဲ ဖြစ်စဥ်မှာ ဖေဖော်ဝါရီ ၇ ရက် ည၁၁နာရီကျော်က ဘီလင်းမြို့နယ် ကမာဆိုင်ကွက်သစ် ကျေးရွာအနီး ကားခုနှစ်စီးပါ စစ်ကောင်စီယာဉ်တန်းကို KNU/KNLA တပ်မဟာ(၁)၊ ရင်း(၂)၊ ခွဲ(၃) နှင့် TPG ပူးပေါင်းအဖွဲ့တို့မှ မိုင်းသုံးကြိမ်၊ RPG လက်နက်ကြီးသုံးလုံးအပါအဝင် လက်နက်ငယ်များ ဖြင့်တိုက်ခိုက်ခဲ့သည်။
အပြန်အလှန်ပစ်ခတ်မှုများရှိခဲ့ပြီးတိုက်ပွဲဖြစ်ပွားခဲ့ရာ အကြမ်းဖက် စစ်ကောင်စီဘက်မှ ကားလေးစီးပျက်စီးခဲ့ကာ တပ်သား အယောက်(၃၀) ထိခိုက်ဒဏ်ရာရရှိခဲ့ကြောင်း ကနဦး သိရသည်ဟု TPGက ဆိုသည်။
Public Service Announcement
အကြမ်းဖက်စစ်ကောင်စီတပ်၏ သေဆုံးမှုစာရင်းကို အတည်ပြုနေဆဲဖြစ်ပြီး ပူးပေါင်းတပ်ဖွဲ့မှ အထိအခိုက်မရှိ အောင်မြင်စွာဆုတ်ခွာနိုင်ခဲ့ဟု ထုတ်ပြန်ချက်တွင် ဖော်ပြသည်။
ဖေဖော်ဝါရီ ၃ ရက်ကလည်း KNLA တပ်မဟာ (၁)၊တပ်ရင်း(၂)၊တပ်ခွဲ(၁)နှင့် သထုံပြည်သူ့ ပြောက်ကျား(TPG)တပ်ဖွဲ့တို့ ပူးပေါင်း၍ ထုံးဘိုကြီး ထုံးဘိုလေးကျေးရွာကြားတွင် အကြမ်းဖက်စစ်ကောင်စီစစ်ကြောင်းကို မိုင်းဆွဲတိုက်ခိုက်ရာ စစ်ကောင်စီဘက်မှ ၅ဦးသေပြီး ၃ဦးဒဏ်ရာရခဲ့သည်။
