အိန္ဒိယနိုင်ငံဆိုင်ရာ မြန်မာသံအမတ်ကြီးနှင့် သံရုံးဝန်ထမ်းများကို ပြည်သူ့ဘက်ရပ်တည်ရန် India For Myanmar တက်ကြွလှုပ်ရှားသူများက တောင်းဆိုတိုက်တွန်းသည်။
ယနေ့ကျရောက်သော ပင်လုံစာချုပ်ချုပ်ဆိုခြင်းအထိမ်းအမှတ်နေ့တွင် အဆိုပါ တက်ကြွလှုပ်ရှားသူများက နယူးဒေလီမြို့ရှိ မြန်မာသံရုံးသို့ သွားရောက်ကာ အိတ်ဖွင့်ပေးစာပေးပို့ခဲ့ခြင်းဖြစ်သည်။
“မြန်မာပြည်သူတို့၏ ဒုက္ခများအား ထပ်တိုးနာကျင်စေမည့် ဖက်ဆစ်စစ်တပ်၏ အမိန့်ပေးခိုင်းစေနေမှုများအား လိုက်နာကျင့်ကြံနေသည့် လုပ်ရပ်များ အားလုံးကို ရပ်ပြီး သံအမတ်ကြီးနှင့် သံရုံးဝန်ထမ်းများအနေဖြင့် ပြည်သူနှင့်အတူ ပူးပေါင်းလာလိမ့်မည်ဟုလည်း ကျွန်ုပ်တို့မျှော်လင့်ပါသည်”ဟု India For Myanmar ၏ အိတ်ဖွင့်ပေးစာ၌ ဖော်ပြသည်။
ထိုသို့ ပြည်သူ့ဘက် ရပ်တည်ရန် နှိုးဆော်တိုက်တွန်းမှုများအား ဥပေက္ခာပြုပါက အိန္ဒိယနိုင်ငံရောက် မြန်မာများအနေဖြင့် ပြင်းထန်သော ဆန့်ကျင့်ရှုတ်ချမှုများ ပြုလုပ်သွားမည်ဖြစ်ကြောင်း အသိပေးထားသည်။
Public Service Announcement
ထို့အပြင် ဓမ္မဘက်တွင် ရပ်တည်ရန် အချိန်နောက်ကျသည်ဟူ၍ မရှိဘဲ ပြည်သူ့အတွက် မျက်နှာမူသည့် ပြည်သူ့၀န်ထမ်းကောင်းများကို ပြည်သူများက အစဉ်တစိုက်ကြိုဆိုနေကြောင်းလည်း အိတ်ဖွင့်ပေးစာ၌ ဖော်ပြသည်။
အကြမ်းဖက်စစ်တပ်သည် မြန်မာပြည်သူများကို အကြောက်တရားဖြင့် အုပ်ချုပ်ရန် ကြိုးစားခဲ့သည်မှာ ပြီးခဲ့သည့် ဖေဖော်ဝါရီ ၁ ရက်တွင် (၁)နှစ်ပြည့်ခဲ့သော်လည်း ယခုအချိန်အထိ ပြည်သူကိုလုံး၀အုပ်ချုပ်ခွင့်မရသေးပေ။
