ရန်ကုန်မြို့ ကြည့်မြင်တိုင်မြို့နယ်ရှိ လျှပ်စစ်မီတာခမဆောင်သည့် နေအိမ်များအား ယနေ့ (ဖေဖော်ဝါရီ ၁၆)နံနက်ပိုင်းတွင် အကြမ်းဖက်စစ်ကောင်စီလက်ပါးစေများက လျှပ်စစ်မီးများ လိုက်လံဖြတ်တောက်နေကြောင်း ဒေသခံများက ပြောသည်။
” ရပ်ကွက်ထဲကို စစ်ကားတစ်စီးနဲ့ မီတာစာရေးတွေ လိုက်စစ်ပြီး မီးလိုက်ဖြတ်တာပါ။ မီတာခ ၇ သိန်းကျော် ကျတဲ့အိမ်တွေဆို မီတာအလုံးလိုက်ပါ ဖြတ်ယူသွားတယ်။ ဆောင်ရင်တောင် ချက်ချင်း ပြန်တက်ဖို့ မလွယ်အောင် လုပ်တာပါ။ ကျွန်တော်တို့ကတော့ လုံးဝမဆောင်ဘူး။ သူတို့ကို မီတာခဆောင်မယ့်အစား မီးရဖို့ အခြားနည်းပဲ ကြိုးစားတော့မယ် “ ဟု ကြည့်မြင်တိုင်မြို့နယ်နေ ပြည်သူတစ်ဦးက ပြောသည်။
အကြမ်းဖက်စစ်ကောင်စီတပ်သားများနှင့် လျှပ်စစ်ဌာနမှ CDM ပြုလုပ်ခြင်းမရှိသော ဝန်ထမ်းများက လိုက်လံဖြတ်တောက်နေခြင်းဟု ဒေသခံများက ဆိုသည်။
ထို့အပြင် လျှပ်စစ်မီတာခတောင်းခံလွှာတွင် ပါရှိသည့် ကျသင့်ငွေသည် အမှန်တကယ် အသုံးပြုခဲ့သည်ထက် ပိုများနေကြောင်းလည်း ဒေသခံတစ်ဦးက ပြောသည်။
Public Service Announcement
” အခု မီတာခတွေက ၉ လစာဆိုပြီး အများကြီး ကျနေတယ်။ ဘယ်လိုတွက်မှန်းလည်း မသိဘူး။ မီတာလဲ လာဖတ်တာ မတွေ့ပဲ ရမ်းတွက်နေသလိုပဲ။ ကျွန်တော်တို့အိမ်ဆို လူမရှိတာများတော့ မီးအမြဲမသုံးတာကို ၈သိန်းကျော် ၉ သိန်း နီးပါးကျနေတယ်။ မီးကလဲ ပျက်နေတာများတယ် ” ဟု၎င်းက ပြောသည်။
အကြမ်းဖက်စစ်ကောင်စီသည် ပြီးခဲ့သည့် စက်တင်ဘာကစတင်၍ အခွန်ငွေ ရရှိစေရန်ဆိုကာ လျှပ်စစ်မီတာခများကို အတင်းအကြပ်လိုက်လံကောက်ခံနေခြင်း ဖြစ်သည်။
စစ်တပ်က အာဏာသိမ်းပြီးနောက် စစ်အာဏာရှင် သက်ဆိုးမရှည်ရေးအတွက် အခွန်မပေးဆောင်ရန်ဟုဆိုကာ မီတာဆောင်ခြင်း၊ အခြားသော အခွန်များ ပေးဆောင်ခြင်းတို့ကို မပြုလုပ်ကြရန် တော်လှန်ရေးအင်အားစုများက ပြည်သူများအား မေတ္တာရပ်ခံထားသည်။
ထို့ကြောင့် လျှပ်စစ်မီး ဖြတ်တောက်ခံရသည့် ပြည်သူအချို့ကလည်း မီးစက်များ၊ နေရောင်ခြည်စွမ်းအင်သုံး ဆိုလာများ အသုံးပြုနေကြသည်။
