တကောင်းနီကယ်စက်ရုံကို သတ္တုရိုင်းမြေစာ ပေးပို့နေတဲ့ စက်ရုံ က ဓာတ်အားတိုင် သုံးတိုင် ဖောက်ခွဲဖျက်ဆီးခံရတာနဲ့ပတ်သက် ဒေသခံ လုပ်သား နှစ်ဦးဖမ်းဆီးခံထားရတယ်လို့သိရပါတယ်။
ဓာတ်အားလိုင်းတွေ ဖောက်ခွဲခံရပြီးတဲ့နောက် စက်ရုံထဲက လုပ်သား နှစ်ဦးကို စစ်ကောင်စီ ဟာ ဖမ်းဆီးလိုက်ပြီး ထီးချိုင့်မှာ ချုပ်ထားတယ်လို့ ကာယကံရှင်မိသားစုဝင်တွေနဲ့နီးစပ်သူတွေက ပြောပြပါတယ်။
“အခုက တောထဲက PDFတွေနဲ့ အဆက်သွယ်ရှိတယ် ဒီဓာတ်အားလိုင်းဖောက်ခွဲမှုမှာပါတယ်ဆိုပြီး အကြမ်းဖက်ပုဒ်မနဲ့ စက်ရုံဝင်ထဲကိုဝင်ဖမ်းသွားတာပါ”လို့ ဖမ်းခံရသူ နှစ်ဦးရဲ့မိသားစုနဲ့ နီးစပ်သူတစ်ဦးကပြောပါတယ်။
တကောင်းနီကယ်စက်ရုံဟာ စစ်ကိုင်းတိုင်း ထီးချိုင့်မြို့နယ်ထဲမှာတည်ရှိတာပါ။ အဲဒီစက်ရုံအတွက် မန္တလေးတိုင်း သပိတ်ကျင်းမြို့နယ်ထဲမှာရှိတဲ့ တကောင်းတောင်ကနေ နီကယ်သတ္တုရိုင်းမြေစာတွေကို နေ့စဉ်ပိုက်လိုင်းနဲ့ပေးပို့တာလို့သိရပါတယ်။
မြေစာပေးပို့ရာမှာ တကောင်းတောင် တောင်ခြေမှာရှိတဲ့ စက်ရုံကနေ ပိုက်လိုင်းနဲ့ပေးပို့တာပါ။
ဇန်နဝါရီလဆန်းပိုင်းကတော့တကောင်းတောင်ခြေစက်ရုံကို သွယ်တန်းထားတဲ့ ဓာတ်အားလိုင်းဖောက်ခွဲဖျက်ဆီးခံခဲ့ရတာဖြစ်ပါတယ်။
ဓာတ်အားလိုင်းဖောက်ခွဲတာကို Special.9-HPDF နဲ့ Fox Army-HPDFတို့က ပူးပေါင်းပြီး ဖျက်ဆီးဖောက်ခွဲ ခဲ့တယ်လို့ Fox Army- HPDF ကထုတ်ပြန်ထားတာရှိပါတယ်။
နီကယ်စက်ရုံတာဝန်ရှိသူတွေဟာ စစ်ကောင်စီတပ်ဖွဲ့ဝင်တွေကို စက်ရုံအတွင်းလက်ခံတာ၊ ဧည့်ခံကျွေးမွေးတာ၊ အားပေးအားမြှောက် လုပ်တာတွေကြောင့် သတိပေးတဲ့အနေလုပ်ဆောင်ခဲ့တာလို့ဆိုထားပါတယ်။