▪️လာမည့်ဖေဖော်ဝါရီ ၂၁ရက် ICJရုံးချိန်း ကိုယ်စားပြုခွင့် NUG နှင့် စစ်ကောင်စီ အပြိုင်လျှောက်ထား
အကြမ်းဖက်စစ်ကောင်စီသည် မြန်မာနိုင်ငံ၏ အစိုးရမဟုတ်သဖြင့် အပြည်ပြည်ဆိုင်ရာတရားရုံး(ICJ)တွင် နိုင်ငံအတွက် ကိုယ်စားမပြုသင့်ကြောင်း မြန်မာနိုင်ငံဆိုင်ရာ အထူးအကြံပေးကောင်စီ(SAC-M)က ပြော သည်။
ကုလသမဂ္ဂကျွမ်းကျင်ပညာရှင်များဖြင့် ဖွဲ့စည်းထားသော SAC-M သည် ‘အပြည်ပြည်ဆိုင်ရာ တရားရုံးမှ မြန်မာနိုင်ငံ၏ အမှုအခင်း’ နှင့်ပတ်သက်၍ အနှစ်ချုပ်စာတမ်းတိုတစ်စောင်ကို ထုတ်ပြန်ထားရာ ယင်းစာတမ်း ၌ အမျိုးသားညီညွတ်ရေးအစိုးရ(NUG)ကသာ ICJ ၌ ကိုယ်စား ပြုခွင့်ရသင့်ကြောင်း ရေးသားထားသည်။
ICJ သည် ကုလသမဂ္ဂ၏ အစိတ်အပိုင်းဖြစ်ပြီး ကုလသမဂ္ဂတွင် စစ်ကောင်စီက ကိုယ်စားပြုခွင့် ရရှိမထားဘဲ NUGမှ ခန့်အပ်ထားသော သံအမတ်ကြီး ဦးကျော်မိုးထွန်းက ကိုယ်စားပြုခွင့်ရရှိနေ၍ ICJ ကိုယ်စားပြုခွင့်ကို NUG က ရသင့်ကြောင်း အထူးအကြံပေးကောင်စီက သုံးသပ်တိုက်တွန်းသည်။
Public Service Announcement
ထို့အပြင် အမျိုးသားညီညွတ်ရေးအစိုးရသည် နိုင်ငံတကာတွင် မြန်မာနိုင်ငံ၏ တရားဝင်အစိုးရ အဖြစ် အသိအမှတ်ပြုခံရသင့်ကြောင်းလည်း SAC-M က ဆိုသည်။
လာမည့် ဖေဖော်ဝါရီ ၂၁ ရက်တွင် မြန်မာ-ဂမ်ဘီယာအမှုကို ICJ က ဆက်လက်စစ်ဆေးမည်ဖြစ်ပြီး အဆိုပါရုံးချိန်းတွင် ကိုယ်စားပြုခွင့်နှင့်ပတ်သက်၍ တိကျစွာထုတ်ပြန်ကြေညာခြင်းမရှိသေးပေ။
NUGက သံအမတ်ကြီးဦးကျော်မိုးထွန်းကို မြန်မာကိုယ်စားလှယ်အဖြစ် ခန့်အပ်ကာ နိုင်ငံတကာ ရှေ့နေ ၂ ဦးပါဝင်သော ဥပဒေပညာရှင်အဖွဲ့ကို မကြာသေးမီက ဖွဲ့စည်းထားသည်။
သို့သော် အကြမ်းဖက်စစ်ကောင်စီကလည်း ICJ ရုံးချိန်းအတွက် ၎င်း၏ ကိုယ်စားလှယ်အဖွဲ့ကို စေလွှတ်မည်ဟု ပြောကြားထားသည်။
