ဒီပဲယင်းမြို့နယ်တွင်း ယနေ့(ဖေဖော်ဝါရီ ၁၉)တစ်ရက်တည်း ကျေးရွာသုံးရွာ ထက်မနည်းကို စစ်ကောင်စီတပ်က ဝင်ရောက်သောင်းကြမ်းဖျက်ဆီး သွားကြောင်း ဒီပဲယင်းမြို့နယ် ဒေသကာကွယ်ရေးတပ်ဖွဲ့များက ပြောသည်။
စစ်ကောင်စီတပ်များ ဝင်ရောက်ဖျက်ဆီးခံရသည့် ကျေးရွာများတွင် ရွာသစ်၊ ပဝါနှင့် ယင်းတွေကျေးရွာတို့ဖြစ်ပြီး နေအိမ်အချို့မီးဖျက်ဆီးခံရသည့်အပြင် နေအိမ်ဖောက်ထွင်း၍ အတွင်းပစ္စည်းများ ခိုးယူမှုလည်းရှိကြောင်း ၎င်းတပ်ဖွဲ့ဝင် များက ပြောသည်။
“ဒီပဲယင်းမြို့အနီးနားကရွာတွေကို မီးရှို့သွားပါတယ်။ အိမ်တွေကို မွှေနှောက်ပြီး တော့ ပစ္စည်းတွေပါ ခိုးယူသွားကြတယ်”ဟု Free Rangers-Depeyin မှ ရဲဘော်တစ်ဦးက ပြောသည်။
အကြမ်းဖက်စစ်ကောင်စီတပ်များသည် ယနေ့နံနက် ၉ နာရီခန့်က ဒီပဲယင်းမြို့နှင့် တစ်မိုင် ပတ်လည်ခန့်သာဝေးသည့် အထက်ပါကျေးရွာသုံး ရွာအား ဝင်ရောက်သောင်းကြမ်း ခဲ့ခြင်းဖြစ်ကြောင်း ၎င်းက ဆက်ပြောသည်။
Public Service Announcement
ဒီပဲယင်းရင်းညီနောင်များအဖွဲ့၏ ပြောဆိုချက်များအရ လက်ရှိအခြေအနေတွင် ဒီပဲယင်း မြို့နယ်အတွင်း တိုက်ပွဲကြီးကြီးမားမားမရှိသေးသော်လည်း စစ်ကောင်စီဘက်မှ ကျေးရွာများသို့ လက်နက်ကြီးပစ်ခတ်မှုများရှိနေကြောင်း သိရသည်။
