စစ်အုပ်စုက ပြည်သူလူထုအပေါ် လူမဆန်စွာနှိပ်စက်နေပုံမှာ စကားလုံးများဖြင့် ဖော်မပြနိုင်အောင် အောက်တန်းကျနေဟု ဗကသများအဖွဲ့ချုပ်ထုတ်ပြန်

▪️ဗကသ အမျိုးသမီးရဲဘော်တစ်ဦးအပါအဝင် အခြားအမျိုးသမီးများ၊ အမျိုးသားများပါ စစ်ကြောရေး၌ လိင်ပိုင်းဆိုင်ရာစော်ကားခံ​နေရ

မင်းအောင်လှိုင် စစ်အုပ်စု၏ ပြည်သူလူထုအပေါ် လူမဆန်စွာနှိပ်စက်နေပုံမှာ စကားလုံးများဖြင့် ဖော်မပြနိုင်အောင် အောက်တန်းကျနေပြီဖြစ်သည်ဟု ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ်(ဗကသများအဖွဲ့ချုပ်)က ဖေဖော်ဝါရီ ၁၉ရက်တွင် ထုတ်ပြန်သည်။

ဗကသများအဖွဲ့ချုပ်၏ အမျိုးသမီးရဲဘော်တစ်ဦးသည် မတရားဖမ်းဆီးခံရကာ စစ်ကြောရေး၌ လိင်ပိုင်းဆိုင်ရာစော်ကားခံရပြီး ထောင်၌ တိုက်ပိတ်နှိပ်စက်ထားကြောင်း သိရသည်ဟု ထုတ်ပြန်ချက်၌ ဖော်ပြသည်။

ယင်းအမျိုးသမီးရဲဘော်သာမက တခြားဖမ်းဆီးခံအမျိုးသမီးများသည်လည်း လိင်ပိုင်းဆိုင်ရာစော်ကားခံရသည်များရှိခဲ့ပြီး အမျိုးသားများသည်လည်း စစ်ကြောရေး၌ လိင်ပိုင်းဆိုင်ရာ ပြုကျင့်ခံရှုများရှိခဲ့သည်ဟု ဆိုသည်။

Public Service Announcement

ထို့အတွက် ပြည်တွင်း၊ပြည်ပမှ ဥပဒေဆိုင်ရာအဖွဲ့အစည်းများ၊ အရပ်ဘက်အဖွဲ့အစည်းများ အပါအဝင် ဒီမိုကရေစီအရေး ထောက်ခံအားပေးသူများအနေဖြင့် ယခုကဲ့သို့လိင်ပိုင်းဆိုင်ရာ စော်ကားမှု များကို ရေငုံနှုတ်ပိတ်မနေဘဲ ကူညီဆောင်ရွက်ကြရန်နှင့် အနှိပ်စက်ခံရသဖြင့် ဒဏ်ရာရရှိသူများအတွက် ဆေးကုသခွင့်ရရှိရေးကိုပါ ကူညီဆောင်ရွက်ကြရန် ဗကသများအဖွဲ့ချုပ်က တိုက်တွန်းထားသည်။

ဗကသရဲဘော်များသည် စစ်အာဏာရှင်စနစ်၊ မတရားမှုအပေါင်းကို တိုက်ပွဲဆင်ကတည်းက အရာရာကို စွန့်လွှတ်ခဲ့ပြီးသားဖြစ်၍ စစ်အုပ်စု၏ ဖိနှိပ်မှုများ၊ ရက်စက်မှုများက တော်လှန်ရေး ကို တစ်စက္ကန့်မျှပင် တွန့်ဆုတ်စေမည်မဟုတ်ကြောင်း ထုတ်ပြန်သည်။