အပြည်ပြည်ဆိုင်ရာတရားရုံး(ICJ)သည် စစ်ကောင်စီအဖွဲ့ကို အစိုးရအဖြစ်လက်ခံအသိအမှတ်ပြုခြင်းမဟုတ်ဘဲ နိုင်ငံကိုယ်စားလက်ခံခြင်းဖြစ်ကြောင်း တရားသူကြီးအဖွဲ့ ဥက္ကဌက ပြောသည်။
မြန်မာ-ဂမ်ဘီယာအမှု၏ ဒုတိယအကြိမ် ကြားနာမှုမစတင်မီ ICJ တရားသူကြီး ဥက္ကဌ Joan E. Donoghue က တရားခွင်၌ အကြိုရှင်းလင်းစဥ် ထည့်သွင်းပြောကြားခြင်းဖြစ်သည်။
“ကြားနာမှု မစတင်ခင် ကြိုတင်အသိပေးလိုတာက ICJ ဟာ အစိုးရ(Government)တွေကို အသိအမှတ်ပြုတာမဟုတ်ပါဘူး။ နိုင်ငံတွေ(States)ကို ကိုယ်စားပြုစေတာဖြစ်ပါတယ်”ဟု Joan E. Donoghueက ပြောသည်။
ယနေ့ တရားခွင်သို့ မြန်မာကိုယ်စားလှယ်အဖြစ် အကြမ်းဖက်စစ်ကောင်စီ လက်အောက်ခံ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးကိုကိုလှိုင် ဦးဆောင်တက်ရောက်သည်။
Public Service Announcement
အကြမ်းဖက်စစ်ကောင်စီသည် ICJက ချမှတ်ထားသော ကြားဖြတ်အမိန့်များကို လိုက်နာဆောင်ရွက်နေကြောင်းနှင့် ဂမ်ဘီယာအနေဖြင့် OIC(အပြည်ပြည်ဆိုင်ရာအစ္စလာမ်မစ်အဖွဲ့)ကိုယ်စား တရားစွဲတင်နိုင်ခွင့်မရှိကြောင်း ချေပနေသည်။
ယနေ့တရားခွင်တွင် စစ်ကောင်စီကိုယ်စားလှယ်နှင့် ရှေ့နေများက ၃ နာရီကြာ လျှောက်လဲခွင့်ရရှိမည်ဖြစ်သည်။
ထို့အပြင် ယနေ့ တရားခွင်ထူးခြားချက်အချို့မှာ မြန်မာဘက်မှ ရှေ့နေ ဝီလီယံရှားဘတ်စ်နုတ်ထွက်မှုအပါအဝင် ရှေ့နေအဖွဲ့ဝင်အချို့ ပြောင်းလဲခြင်းနှင့် ICJ တရားသူကြီး ဥက္ကဌနေရာ ပြောင်းလဲခြင်းဖြစ်သည်။
၂၀၁၉ ဒီဇင်ဘာက ပထမအကြိမ်ကြားနာမှုတွင် ဆိုမာလီနိုင်ငံသား Abdulqawi Ahmed Yusuf က တရားသူကြီး ဥက္ကဌဖြစ်ပြီး ၂၀၂၁ ဖေဖော်ဝါရီလဆန်းမှစတင်ကာ အမေရိကန်နိုင်ငံသူ Joan E. Donoghue က ပြောင်းလဲတာဝန်ယူသည်။
