မိုးဗြဲတိုက်ပွဲ၌ ရှေ့တန်းရဲဘော်များအား ဆေးကုသမှုပေးရင်း တိုက်ပွဲ၌ ကျဆုံးခဲ့သည့် ကရင်နီဒီမိုကရက်တစ်တပ်ဦး(KDF)အဖွဲ့ဝင် ဒေါက်တာအောင်ကြီး၏ ရုပ်အလောင်းကို သုံးရက်အကြာတွင် ပြန်လည်ကောက်ယူနိုင်ခဲ့သည်ဟု KDFက ထုတ်ပြန်သည်။
ဒေါက်တာအောင်ကြီးသည် ဖေဖဝါရီ ၁၈ရက်က မိုးဗြဲ တိုက်ပွဲအတွင်း တော်လှန်ရေးဒဏ်ရာရ ရဲဘော်များအား ဆေးကုသမူပေးနေစဉ် အကြမ်းဖက်စစ်ကောင်စီတပ်၏ လက်နက်ကြီးကျည်ထိမှန်၍ ကျဆုံးခဲ့ရာ ရုပ်အလောင်းကို သုံးရက်အကြာတွင် မိုးဗြဲပြည်သူ့ကာကွယ်ရေးတပ်(PDF)မှ အခက်အခဲများကြားမှ ကြိုးစား၍ ပြန်လည် သယ်ဆောင်ပေးလာခြင်းဖြစ်သည်ဟု ဆိုသည်။
ရုပ်အလောင်းအား သယ်ဆောင်ပေးသော မိုးဗြဲ PDF တော်လှန်ရေးရဲဘော်များအား KDFအဖွဲ့ ကိုယ်စား ကျေးဇူးတင်သည်ဟု ဖော်ပြထားသည်။
ဒေါက်တာအောင်ကြီး၏ ရုပ်အလောင်းကို မိသားစုဝင်များ၏ တောင်းဆိုချက်အရ ဖေဖော်ဝါရီ ၂၁ရက် နေ့လယ်ပိုင်းတွင် မီးသဂြိုလ်ပေးခဲ့သည်ဟု ဖော်ပြထားသည်။
KDF ဆေးအဖွဲ့ဝင်ဖြစ်သော ဒေါက်တာအောင်ကြီး(ခ)စွမ်းထက်အောင် ဆုံးရှုံးခဲ့ရသောကြောင့် KDF အဖွဲ့သားများမှများစွာဝမ်းနည်းကြောင်းနှင့် ကျဆုံးသွားသော ဒေါက်တာအောင်ကြီးအား အာဇာနည် သူရဲကောင်းအဖြစ် အစဥ်ထာဝရအသိအမှတ်ပြုကြောင်း ထုတ်ပြန်ခဲ့သည်။
ကရင်နီဒေသ တော်လှန်ရေးတပ်ဖွဲ့များအနေဖြင့် ၎င်းတို့၏ ကျဆုံးရဲဘော်များ၏ ရုပ်အလောင်းအား တိုက်ပွဲအခြေအနေကြောင့် ချက်ချင်းမကောက်ယူနိုင်သည့်တိုင် အခြေအနေပေးသည့် အချိန်၌ ပြန် လည်ကောက်ယူကာ ကောင်းမွန်စွာ သင်္ဂြိုလ်ပေးလေ့ရှိသည်။