▪️စစ်ကောင်စီတပ်မှ ငါးဦးထက်မနည်းသေဆုံးပြီး လက်နက်သုံးလက်ရဟု PDF ထုတ်ပြန်
ရှမ်းပြည်နယ်တောင်ပိုင်း ဖယ်ခုံမြို့ လွယ်ပါသာဘုရားတောင်နှင့် ကုန်းဆုံဘုရားတောင်တို့တွင် တပ်စွဲထားသော စစ်ကောင်စီတပ်ကို ယနေ့ နံနက်ကတိုက်ခိုက်ခဲ့ရာ စစ်ကောင်စီတပ်မှ ငါးဦးထက်မနည်းသေဆုံးပြီး လက်နက် သုံးလက်နှင့် ခဲယမ်းအချို့ရရှိခဲ့ကြောင်း ဖယ်ခုံပြည်သူ့ကာကွယ်ရေးတပ်(PDF)က ထုတ်ပြန်သည်။
ဖေဖော်ဝါရီ ၂၂ရက် နံနက် ၆နာရီတွင် ဖယ်ခုံ PDFနှင့် မဟာမိတ်တပ်ဖွဲ့များ၊ ပြည်သူ့ကာကွယ်ရေးတပ်မတော်၊နည်းပညာလက်ရုံးတပ်တို့၏အကူအညီဖြင့် စစ်ကောင်စီတပ်ကို တိုက်ခိုက်ခဲ့ခြင်းဖြစ်သည်ဟု ဆိုသည်။
တိုက်ပွဲကြာချိန် ၁နာရီနီးပါးအတွင်း စစ်ကောင်စီတပ်ဖွဲ့ဝင်များ ငါးဦးထက်မကသေဆုံးပြီး အများအပြားဒဏ်ရာရရှိခဲ့ကြောင်း၊ တိုက်ပွဲအတွင်း BA 100 တစ်လက် ၊MA 2 တစ်လက်၊MA3 တစ်လက်၊ ကျည်အချို့နှင့်စစ်သုံးပစ္စည်း အနည်းငယ်ရရှိခဲ့ကြောင်း ထုတ်ပြန်သည်။
ဖယ်ခုံPDFက ရဲဘော် သုံးဦးဒဏ်ရာရပြီး တစ်ဦးမှာစိုးရိမ်ရသည့်အခြေအနေရှိ၍ ဆေးကုသမှုခံယူနေကြောင်း ဖော်ပြထားသည်။
ဖယ်ခုံPDFနှင့်တိုက်ပွဲဖြစ်ပွားခဲ့သော စစ်ကောင်စီတပ်မှာ တပ်မ (၅၅)လက်အောက်ခံ ကလောအခြေစိုက် ခလရ -၇ ဖြစ်သည်ဟု ဆိုသည်။