ဖက်ဒရယ်ဒီမိုကရေစီ ပြည်ထောင်စုတည်ဆောက်နိုင်ရေးအတွက် ဖက်ဒရယ်ဒီမိုကရေစီလိုလားသော မဟာမိတ်များနှင့် ပူးပေါင်းဆောင်ရွက်သွားမည်ဖြစ်ကြောင်း ရှမ်းပြည်တိုးတက်ရေးပါတီ(SSPP)က ယနေ့ ထုတ်ပြန်လိုက်သည်။
SSPP ၏ ၂၀၂၁ တိုးချဲ့ဗဟိုကော်မတီမျက်နှာစုံညီ အစည်းအဝေးကို ဇန်နဝါရီ ၂၉ရက်မှ ဖေဖော်ဝါရီ ၂၅ရက်အထိကျင်းပခဲ့ရာ အစည်းအဝေးအပြီးတွင် ထုတ်ပြန်ကြေညာချက် တစ်ရပ်ထုတ်ပြန်ခဲ့ခြင်း ဖြစ် သည်။
လက်ရှိ ဖြစ်ပွားလျက်ရှိသည့် မြန်မာနိုင်ငံ၏ ပြဿနာများကို ဖြေရှင်းနိုင်သည့် တစ်ခုတည်းသော နည်းမှာ တန်းတူရေးနှင့် ကိုယ်ပိုင်ပြဌာန်းခွင့်ကို အခြေခံသော ဖက်ဒရယ်ဒီမိုကရေစီ ပြည်ထောင်စု တည်ဆောက်ခြင်းသာဖြစ်ပြီး ဖက်ဒရယ်ဒီမိုကရေစီသည် ပြည်ထောင်စုတိုင်းရင်းသားအားလုံး၏ ဘုံနိုင်ငံရေးရည်မှန်းချက် ပန်းတိုင်အဖြစ် သံဓိဌာန်ချမှတ်ထားမှသာလျင် စည်းလုံးညီညွတ်သော ပြည်ထောင်စုခရီး ရှေ့ဆက်နိုင်မည်ဖြစ်ကြောင်း SSPPက ဆိုသည်။
ထို့ကြောင့် ပြည်တွင်းစည်းလုံးညီညွတ်ရေးသည် မရှိမဖြစ်လိုအပ်လာပြီဖြစ်၍ ပြည်ထောင်စုအတွင်းရှိ ဖက်ဒရယ်ဒီမိုကရေစီကို လိုလားသော အင်အားစုများ စုစည်းကာ စည်းလုံးညီညွတ်သော အခြေအနေ တစ်ရပ်ဖြစ်အောင်ကြိုးပမ်းတည်ဆောက်ရမည်ဖြစ်ကြောင်းထုတ်ပြန်သည်။
SSPPသည် စစ်တပ်အာဏာသိမ်းပြီးနောက်ပိုင်း စစ်ကောင်စီတပ်နှင့် တိုက်ပွဲဖြစ်ပွားမှုမရှိခဲ့ဘဲ ရှမ်းပြည် ပြန်လည်ထူထောင်ရေးကောင်စီ(RCSS)နှင့် တိုက်ပွဲများ ဖြစ်ပွားခဲ့သည်။ ယခု ကြေညာချက်တွင် ရှမ်းတပ်အချင်းချင်း တိုက်ပွဲမဖြစ်ပွားရေးနှင့် သက်ဆိုင်သည့် အချက်များ သီးခြားဖော်ပြထားမှုမရှိပေ။
SSPP ထုတ်ပြန်ကြေညာချက်၌ မူးယစ်ဆေးဝါး ပပျောက်ရေးကို အရေးကြီးလုပ်ငန်းစဉ်အဖြစ် အဆင့်ဆင့် ကြိုးပမ်းဆောင်ရွက် သွားမည်ဖြစ်သကဲ့သို့ ပြည်သူလူထု အကျိုးပြုသည့် ဒေသဖွံ့ဖြိုးရေးလုပ်ငန်းများကိုလည်း ပို၍ဆောင်ရွက်သွားမည်ဟု ဖော်ပြထားသည်။