ဇူလိုင် ၁၅၊ ၂၀၂၆။ ထားမြတ်/People’s Spring
နယ်မြေတည်ငြိမ်အေးချမ်းရေးနဲ့ ပြည်သူ့လုံခြုံမှုရှိစေရေးတို့အတွက် ဆက်စပ်ပတ်သက်သော အဖွဲ့အစည်းတို့နဲ့ ထိတွေ့ဆက်ဆံညှိနှိုင်းကာ ပြည်ထောင်စုတွင်းပကတိဖြစ်တည်နေသော နိုင်ငံရေးပြဿနာများကို နိုင်ငံရေးနည်းလမ်းဖြင့် ဆက်လက်အဖြေရှာ ဖြေရှင်းသွားဖို့ ဆုံးဖြတ်ကြောင်း ရှမ်းပြည်တိုးတက်ရေးပါတီ(SSPP)က ထုတ်ပြန်ကြေညာပါတယ်။
ဇူလိုင် ၅ရက်ကနေ ၁၂ရက်အထိ SSPP ဗဟိုဌာနချုပ် ဝမ်ဟိုင်းမှာ ကျင်းပခဲ့တဲ့ ဗဟိုကော်မတီ မျက်နှာစုံညီ အစည်းအဝေးအပြီး ကြေညာချက်မှာ အခုလို အသိပေးခဲ့တာပါ။ SSPP ဟာ အာဏာသိမ်းစစ်တပ်နဲ့ တိုက်ပွဲကြီးကြီးမားမားမရှိ၊ အာဏာသိမ်းစစ်တပ် နဲ့ ထိတွေ့ဆွေးနွေးဆက်ဆံနေတဲ့ ရှမ်းလက်နက်ကိုင်တပ်ဖြစ်ပြီး အရင်နှစ်တွေက သူတို့ ချမှတ်ထားတဲ့ နိုင်ငံရေးနည်းအရ အဖြေရှာမယ်ဆိုတဲ့ မူဝါဒကို ထပ်မံ အသိပေး လာတာလည်းဖြစ်ပါတယ်။
SSPP ရဲ့ အစည်းအဝေးမှာ ပါတီလုပ်ငန်းဆိုင်ရာ၊ နိုင်ငံရေး ဆိုင်ရာ၊ စစ်ရေးဆိုင်ရာ ၊ အုပ်ချုပ်ရေးဆိုင်ရာ၊ စီးပွားရေးဆိုင်ရာ၊ ဒေသဖွံ့ဖြိုးရေးဆိုင်ရာ စတာတွေ ဆွေးနွေးကာ ရှေ့လုပ်ငန်းစဉ်တွေ ချမှတ်ခဲ့တာလို့ ဆိုပါတယ်။ ဒီလို ရှေ့လုပ်ငန်းစဉ်ချမှတ်ရာမှာ SSPPအုပ်ချုပ်ရေးနယ်မြေအတွင်းရှိ ပြည်သူတွေရဲ့ ကျန်းမာရေး၊ ပညာရေး လိုအပ်ချက်တွေ အချိန်နဲ့တပြေးညီ လက်တွေ့ကျကျ ဖြည့်ဆည်းဖို့ မူးယစ်ဆေးဝါး နှိမ်နင်းရေးလုပ်ဖို့၊ နယ်မြေအတွင်း အွန်လိုင်းငွေကြေးလိမ်လည်မှုနဲ့ ဆက်စပ်ရာဇဝတ်မှုတွေ မရှိစေရေး ကြပ်မတ်ဖို့ စတဲ့ အချက်တွေ ပါဝင်ပါတယ်။
Public Service Announcement
တဖက်မှာလည်း SSPP နဲ့ ဆွေးနွေးနေတဲ့ စစ်ကောင်စီက SSPP ဟာ မူးယစ်ဆေးဝါး၊ အွန်လိုင်းငွေလိမ်လုပ်ငန်းတွေနဲ့ပတ်သက်တယ်ဆိုတဲ့စွပ်စွဲထုတ်ပြန်ချက်တွေ မကြာခဏပြုလုပ်ခဲ့ရာ အဲဒီလို စွပ်စွဲမှုတွေ ကြုံရတဲ့အခါ SSPP အနေနဲ့လည်း ပတ်သက်မှုမရှိ၊နိုင်ငံရေးလုပ်ကြံမှု ဆိုပြီး စစ်ကောင်စီကို တုန့်ပြန်တာမျိုးရှိခဲ့ပါတယ်။
SSPP နယ်မြေအတွင်းမှာ မူးယစ်ဆေးဝါးချက်စက်ရုံတွေ ဖမ်းမိတာ၊ အွန်လိုင်းလိမ်လည်လုပ်ငန်းတွေ ဖမ်းမိတာ ရှိခဲ့ကြောင်း စစ်အုပ်စုက ထုတ်ပြန်ထားပြီး အဲဒီလိုဖမ်းမိရာမှာSSPPတပ်ဖွဲ့ဝင်တွေ ပါဝင်ကြောင်းဖော်ပြထားတာတွေရှိခဲ့ပါတယ်။SSPP ဘက်ကတော့ စစ်တပ်ရဲ့ စွပ်စွဲမှုတွေနဲ့ပတ်သက်ပြီး တုန့်ပြန်တဲ့ ကြေညာချက်တွေထုတ်ပြန်ခဲ့ရာ အခုနှစ် ဇန်နဝါရီလ SSPP ကြေညာချက်မှာတော့ တရားမဝင်လုပ်ငန်းတွေနဲ့ မပတ်သက်ဟု ငြင်းဆိုခဲ့သလို ၂၀၂၅ နှစ်ကုန်ပိုင်း ကြေညာချက်မှာလည်း အွန်လိုင်းငွေလိမ်လုပ်ငန်းတွေမရှိရေး ကြပ်မတ်မယ်လို့ အသိပေးထားပါတယ်။ဒါ့အပြင် အာဏာသိမ်းစစ်ကောင်စီလက်အောက်ခံမူးယစ်/ရဲတပ်ဖွဲမှ ရှမ်းပြည်တိုးတက်ရေးပါတီ(SSPP/SSA)နဲ့ အဖွဲဝင်အရာရှိများအပေါ် မူးယစ်ဆေးဝါးနဲ့ ပတ်သက်မှု ရှိကြောင်း ထုတ်ပြန်မှုဟာ နိုင်ငံရေးဂုဏ်သိက္ခာကျစေလိုတဲ့ လုပ်ရပ်ဖြစ်တယ်လို့ SSPPက တုံ့ပြန်ခဲ့ပါတယ်။
ဒီလို စွပ်စွဲမှုတွေကြောင့်နှစ်ဖက်အကြား တင်းမာသယောင်ရှိခဲ့ပေမဲ့ ပြီးခဲ့တဲ့ဇွန်လ ဒုတိယပတ်မှာ SSPP ဒုဥက္ကဋ္ဌ ဒုဗိုလ်ချုပ်ကြီး ခွန်ဆိုင်ဦးဆောင်တဲ့ အဖွဲ့နဲ့ စစ်အုပ်စုက ဒုဗိုလ်ချုပ်ကြီးရာပြည့်၊ ဒုဗိုလ်ချုပ်ကြီး မင်းနိုင် တို့ပါဝင်တဲ့ အဖွဲ့တို့ဟာ နေပြည်တော်မှာ ဆွေးနွေးခဲ့ကြပါတယ်။
ဆွေးနွေးပွဲမှာ SSPPက နိုင်ငံရေးပြဿနာ စစ်ရေးနည်းနဲ့ မဖြေရှင်းဖို့ အပါအဝင်အချက် ၇ချက်ဆွေးနွေးခဲ့သလို စစ်တပ်ဘက်ကလည်း လက်ရှိရရှိထားတဲ့ ငြိမ်းချမ်းရေးရလဒ်တွေ တည်ငြိမ်မှုရှိစေဖို့ ဆက်လက်ထိန်းသိမ်းထားပြီး နယ်မြေ တည်ငြိမ်အေးချမ်းရေးကို ထိခိုက်စေမယ့် အခြားလက်နက်ကိုင်အဖွဲများနဲ့ ပူးပေါင်းပါဝင်ပါတ်သက်မှု မရှိစေရေး ထိန်းသိမ်းဆောင်ရွက်သွားဖို့ ပြန်လည်ဆွေးနွေးခဲ့တာရှိပါတယ်။
ယခု SSPP ထုတ်ပြန်ချက်မှာပါတဲ့ အဖွဲ့အစည်းတွေနဲ့ နိုင်ငံရေးပြဿနာ နိုင်ငံရေးအရ အဖြေရှာမယ်ဆိုတဲ့ ကိစ္စရပ်နဲ့ပတ်သက်ပြီး စစ်တပ်အပြင် တော်လှန်ရေးတပ်တွေကိုပါ ရည်ညွှန်းတာမျိုးရှိမရှိ မေးမြန်းဖို့ SSPP တာဝန်ရှိသူအချို့ထံ ဆက်သွယ်ထားဆဲဖြစ်ပါတယ်။
