'/%3E%3C/svg%3E){kind=small}
ကေအဲန်ယူ သထုံခရိုင် ဖားအံမြို့နယ်ထဲမှာ KNLA တပ်မဟာ ၁ နဲ့ စစ်ကောင်စီတို့အကြား သုံးရက်ဆက်တိုက်ထိတွေ့ပစ်ခတ်မှုဖြစ်ပွါးခဲ့ရာ စစ်ကောင်စီဘက်က ၂၀ ခန့် သေဆုံးသွားခဲ့ပြီး ရှစ်ဦး ဒဏ်ရာရရှိသွားခဲ့တယ်လို့ ကေအဲန်ယူက သတင်းထုတ်ပြန်ပါတယ်။
ဖားအံမြို့နယ် KNLA တပ်ရင်း ၁ နယ်မြေအတွင်း ဆယ်ကြိမ်ထက်မနည်းထိတွေ့ပစ်ခတ်မှုဖြစ်ပွါးခဲ့ရာ စစ်ကောင်စီရဲ့ ကားခုနှစ်စီး ပျက်စီးသွားခဲ့ပြီး KNLA ဘက်ကတော့ ထိခိုက်မှုမရှိဘူးလို့ ကေအဲန်ယူကဆိုပါဆယ်။
ဖေဖော်ဝါရီလ ၂၃ ရက်ညနေပိုင်းက ဖားအံမြို့နယ်၊ ဝါးဘိုးတော-ကမမောင်း လမ်းမတစ်လျှောက်မှာ လက်နက်ခဲယမ်းနဲ့ရိက္ခာတွေ တင်ဆောင်လာတဲ့ စစ်ကောင်စီယာဉ်တန်းကို KNLA တပ်မဟာ ၁ တပ်ရင်း ၁ တပ်ဖွဲ့ဝင်တွေက လေးကြိမ်မိုင်းဆွဲ တိုက်တိုက်ခိုက်ခဲ့ပါတယ်။
အဲ့ဒီနေ့မှာ ထိတွေ့ပစ်ခတ်မှု လေးကြိမ်အနက် သုံးကြိမ်မှာ ထိခိုက်သေဆုံးမှုမသိရပဲ ညနေ ၇ နာရီဝန်းကျင်က ထိတွေ့မှုမှာတော့စစ်ကောင်စီဖက်မှ တပ်ခွဲမှူးအဆင့်ရှိသူတစ်ဦးအပါအဝင် သုံးဦးသေဆုံးကာ ကားနှစ်စီးပျက်စီသွားခဲ့တယ်လို့ မြေပြင်သတင်းပေးပို့မှုအရသိရပါတယ်။
Public Service Announcement
ဖေဖော်ဝါရီလ ၂၄ ရက်နေ့က KNLA တပ်ရင်း ၁ တပ်ဖွဲ့တွေနဲ့ စစ်ကောင်စီတပ်ဖွဲ့တို့အကြား မိုင်းဆွဲ ပစ်ခတ်တိုက်ခိုက်မှု ငါးကြိမ်ထက်မနည်းရှိပြီး စစ်ကောင်စီဖက်မှ ဗိုလ်အဆင့်ရှိသူ တစ်ဦးအပါအဝင် ၁၀ ဦးသဆုံးကာ ခုနှစ်ဦးဒဏ်ရာရရှိခဲ့ပြီး ကားလေးစီးပျက်စီးသွားခဲ့တယ်လို့ ထုတ်ပြန်ချက်မှာ ဖော်ပြထားတာပါ။
ဖေဖော်ဝါရီ ၂၅ရက်ကလည်း KNLA တပ်မဟာ ၁ တပ်ရင်း ၁ နယ်မြေအတွင်းမှာ စစ်ကောင်စီနဲ့ KNLA တပ် ထိတွေ့မှု ၂ ကြိမ် ထပ်မံဖြစ်ပွါးခဲ့ရာ စစ်ကောင်စီဖက်မှ ခုနှစ်ဦးသေဆုံးကာ တစ်ဦးဒဏ်ရာရရှိခဲ့ပြီး ကားတစ်စီး ပျက်စီးခဲ့တယ်လို့ ကေအဲန်ယူရဲ့ထုတ်ပြန်ထားချက်အရ သိရပါတယ်။
