ကရင်နီပြည်နယ် လွိုင်ကော်-စံပြ (၆)မိုင်- ဒေါတမကြီး-ဘောလခဲလမ်းကြောင်း အား မတ်လ ၃ ရက်ကစ၍ ပိတ်မည်ဖြစ်ကြောင်း ကရင်နီအမျိုးသားများ ကာကွယ်ရေးတပ်ဖွဲ့ KNDF တပ်ရင်း(၉ )က ထုတ်ပြန်သည်။
“ဒီလို လမ်းပိုင်းတွေပိတ်နေရတဲ့ အနေအထားက စစ်ရေးအခြေအနေကြောင့် လို့ပဲ လောလော ဆယ် ပြောပါရစေ။ပြည်သူတွေနဲ့ ဒေသခံတွေအနေနဲ့ လည်းလိုက်နာကြဖို့ တိုက်တွန်းတယ်”ဟု KNDF တာဝန်ရှိသူတစ်ဦးက လူထုနွေဦးသို့ ပြောသည်။
အဆိုပါလမ်းပိုင်းကို ပိတ်ပင်ရန် ဖေဖော်ဝါရီ ၂၈ ရက်က ကရင်နီပြည်အစိုးရ၊ပြည်ထဲရေးဝန်ကြီး ဌာန၊အမှတ်(၁)ခရိုင် ၊ဒီးမော့ဆို မြို့နယ်အုပ်ချုပ်ရေးမှူးနှင့် KNDF B- 10 နှင့် KNDF- B9 တို့က အစည်းအဝေးပြုလုပ်ဆုံးဖြတ်ခဲ့သည်ဟု သိရသည်။
ထို့ကြောင့် ပြည်သူများအနေဖြင့် လမ်းပိတ်ထားစဥ်ကာလအတွင်း (ဒေသခံ ပြည်သူများ အပါအဝင်)အသွားအလာမပြုလုပ်ရန် မေတ္တာရပ်ခံသည်။
Public Service Announcement
လမ်းပြန်လည်ဖွင့်လှစ်မည့်ရက်အား ပြန်လည်ကြေညာပေးသွားမည်ဟု KNDF B-9က ဆိုသည်။
ကယား(ကရင်နီ)ပြည်နယ်အတွင်း စစ်ရေးအခြေအနေ တင်းမာနေသောကြောင့် လွိုင်ကော်မြို့ မှ လွိုင်လင်မြို့ (ရှမ်း-ကယား နယ်စပ်)လမ်းမကြီးတလျောက် ၁၂ဘီးကားများ၊ အလုံပိတ်ကား ၊မှန်လုံကား၊ တွဲကားများ ၊ကုန်တင်ကားအကြီးများ နှင့် စစ်ကောင်စီ အတွက်အသုံး ပြုသည့် ယာဥ်များ လုံး၀ဖြတ်သန်းသွား လာခြင်းမပြုကြောင်းလည်း KNDF-B-14 က ဖေဖော်ဝါရီ ၂၇ ရက်တွင် ထုတ်ပြန်ထားသည်။
