မကွေးတိုင်း လောင်းရှည်မြို့မှ ဆောမြို့သို့ဦးတည်ထွက်ခွာလာသော စစ်ကောင်စီတပ်ကို လက်ဦးမှုရယူ တိုက်ခိုက်ခဲ့ရာ စစ်ကောင်စီတပ်သား ငါးဦးခန့်သေဆုံးကြောင်း လောင်းရှည် ဒေသပြည်သူ့ကာကွယ်ရေးတပ်ဖွဲ့ (LSRPDF)က ထုတ်ပြန်သည်။
ယနေ့(မတ်လ ၁၉ရက်) နံနက် ၆နာရီခန့်တွင် အင်အား ၅၀ကျော်ခန့်ရှိ စစ်ကောင်စီ၏ ခြေလျင်တပ်သည် လောင်းရှည်မြို့မှတဆင့် PDFများကိုရှောင်ကာ ခိုးကြောင်ခိုးဝှက် စစ် ကြောင်းထွက်လာကြသည်ဟု ဆိုသည်။
စစ်ကောင်စီခြေလျင်တပ်၏ လမ်းကြောင်းအရ လောင်းရှည် မြို့မှ သင်းကွဲတောင် ၊ လပို့တောင်တန်းနှင့် သံပုရာတောင်ကြောကို ဖြတ်၍ ဆောမြို့သို့သွားမည်ဟု LSRPDF က ယူဆသည်။
ထို့ကြောင့် စစ်ကောင်စီခြေလျင်တပ်လာမည့် လမ်းကြောင်းကို တွက်ဆနေရာယူပြင်ဆင်ကာ နံနက်၉နာရီဝန်းကျင်တွင် လပို့တောင် ဘုရားအနောက်ဘက်ခြမ်း ခင်ကြော၌ နှစ်ဖက်ထိတွေ့ တိုက်ပွဲဖြစ်ပွားခဲ့သည်။
Public Service Announcement
တိုက်ပွဲသည် တစ်ဖက်နှင့် တဖက်ပေ(၁၀၀)ခန့်သာ ကွာဝေးသောကြောင့် အလွန်ပြင်းထန်ပီး LSRPDFမှ ရဲဘော်များ ရဲဝံ့စွန့်စားကာ လက်ဦးမှုယူနိုင်သဖြင့် စစ်ကောင်စီတပ်သား ငါးဦးခန့် သေဆုံးခဲ့ကြောင်း ထုတ်ပြန်ချက်၌ ဖော်ပြသည်။
နှစ်ဖက်ထိတွေ့ တိုက်ပွဲသည် ၁နာရီခန့်ကြာ မြင့်ခဲ့ပြီး LSRPDFမှ ရဲဘော်များ အထိခိုက်မရှိ ပြန်လည် ဆုတ်ခွာနိုင်ခဲ့ကြောင်း အသိပေးသည်။
“အခုတိုက်ခံရတဲ့ စခတပ်က သီကုန်းနယ်ထဲ ရှေ့ဆက်သွားနေကြပါတယ်။ ဆော pdf နယ်ပေါ့ ။သူတို့နဲ့လည်းပူးတွဲတိုက်ပွဲ ဝင်သွားဖို့ရှိပါတယ်”ဟု LSRPDF တာဝန်ရှိသူက People’s Spring သို့ ပြောသည်။
