စစ်ကိုင်းတိုင်း ဒီပဲယင်းမြို့နယ်တွင် နေအိမ်များကိုမီးရှို့ဖျက်ဆီးကာ သတ်ဖြတ်လုယက်နေသော အကြမ်းဖက်စစ်ကောင်စီတပ်အား ဒေသကာကွယ်ရေးအဖွဲ့များ ပူးပေါင်းတိုက်ခိုက်ခဲ့ကြောင်း SNAKE EYES – PDF အဖွဲ့က ယနေ့ (မတ် ၁၉)ထုတ်ပြန်သည်။
ယမန်နေ့(မတ် ၁၈)က C&T SHWEBO ၊ SNAKE EYES-PDF နှင့် တပ်ပေါင်းစု(၂)တို့သည် ဒီပဲယင်းမြို့နယ်ရှိ ဒေသခံကာကွယ်ရေးအဖွဲ့များနှင့်ပူးပေါင်း၍ တနယ်-ဆင်ရောက်ကုန်းရွာ၌ ခေတ္တအထိုင်ချထားသော အကြမ်းဖက်စစ်ကောင်စီတပ်များကို တိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြသည်။
တိုက်ခိုက်ခံရမှုကြောင့် စစ်ကောင်စီဘက်မှ ၁၀ဦးသေဆုံးပြီး အများအပြားဒဏ်ရာရရှိကာ ပင်စည်ရွာကိုဖြတ်၍ ဒီပဲယင်းမြို့သို့ဦးတည် ဆုတ်ခွာသွားကြောင်း SNAKE EYES – PDF အဖွဲ့က ဖော်ပြသည်။
အဆိုပါ စစ်ကောင်စီတပ်များသည် ဒီပဲယင်းမြို့နယ်ရှိ ညောင်လှရွာ၊ နမြားရွာ၊ ယဉ်ကျေးရွာ၊ မရိုးကုန်းရွာ ၊ကြူဝောာရွာ၊ ကျွဲတိုးခြုံရွာ ၊ချောင်းမြီးတိုရွာ ၊တည်တောရွာ ၊သပြေကုန်းရွာ ၊မြင်းတန့်ကျေးရွာ ၊ဒိုင်နက်ရွာ ၊မရကန်ရွာ ၊ရွာသစ်ရွာ ၊တနယ်- ဆင်ရောက်ကုန်းကျေးရွာတစ် လျှောက် တစ်ပတ်ခန့် ဆက်တိုက်စစ်ကြောင်းထိုးလာသော အင်အား ၁၀၀ခန့်ပါ စစ်ကြောင်းဖြစ်သည်။
စစ်ကြောင်းတစ်လျှောက်ရှိ ကျေးရွာများအား ဝင်ရောက်သောင်းကျန်းခဲ့ရာ မရကန်ကျေးရွာရှိ နေအိမ်(၈)လုံးကိုမီးရှို့ဖျက်ဆီးပြီး သက်ကြီးရွယ်အိုတစ်ဦးအား မီးရှို့သတ်ဖြတ်ခဲ့သည်ဟု ထုတ်ပြန်ချက်တွင် ဖော်ပြသည်။
စစ်ကောင်စီတပ်၏ အကြမ်းဖက်လုပ်ရပ်များရပ်တန်းကရပ်စေရန် ကာကွယ်ရေးအဖွဲ့အစည်းများလက်တွဲပြီး အကြမ်းဖက်စစ်ကောင်စီအဖွဲ့ဝင်များကို နယ်စည်းမခြားပဲ ဆထက်တိုး၍ တော်လှန်သွားမည်ဖြစ်ကြောင်း SNAKE EYES – PDF က အသိပေးထားသည်။