'/%3E%3C/svg%3E){kind=small}
ချင်းအမျိုးသားတပ်ဦး(Chin National Front) သည် ပြည်သူနှင့်အတူရပ်တည်ကာ အာဏာသိမ်းစစ်ကောင်စီကို ခုခံတွန်းလှန်ခြင်းတွင် ပါဝင်ဦးဆောင်နေ၍ တိုင်းရင်းသားပြည်သူများကိုယ်စားများစွာကျေးဇူးတင်ဂုဏ်ယူကြောင်း အမျိုးသားညီညွတ်ရေးအစိုးရ(NUG) က ထုတ်ပြန်သည်။
ယနေ့ကျရောက်သော ချင်းအမျိုးသားတပ်ဦးဖွဲ့စည်းတည်ထောင်ခြင်း (၃၄) နှစ်မြောက် ချင်းတော်လှန် ရေးနေ့အခမ်းအနားသို့ အမျိုးသားညီညွတ်ရေးအစိုးရ (NUG)က သဝဏ်လွှာပေးပို့ရာတွင် ထည့်သွင်းဖော်ပြခြင်းဖြစ်သည်။
၃၄ နှစ်တာကာလအတွင်း ချင်းအမျိုးသားတပ်ဦးအား ခေါင်းဆောင်မှုပေးခဲ့ကြသည့် အဆက်ဆက်သောခေါင်းဆောင်များနှင့်တကွ ကိုယ်ကျိုးစွန့်အသက်ပေးတာဝန်ထမ်းဆောင်ခဲ့ကြသည့် ချင်းအမျိုးသမီး၊ အမျိုးသားများအားလုံးကို ဂုဏ်ယူစွာ ဦးညွတ်အလေးအမြတ်ပြုကြောင်းလည်း NUG က ဖော်ပြသည်။
ပြည်ထောင်စုလွှတ်တော်ကိုယ်စားပြုကော်မတီ (CRPH)ကလည်း ယနေ့ကျရောက်သော ချင်းတော်လှန်ရေးနေ့တွင် ပြည်ထောင်စုချင်းတိုင်းရင်းသားများနှင့်တကွ ပြည်သူများ မျှော်မှန်း တောင့်တနေသော ဖက်ဒရယ်ဒီမိုကရေစီနိုင်ငံတော်သစ်ကို အမြန်ဆုံးတည်ဆောက်နိုင်ပါစေ ကြောင်း ဆုမွန်ကောင်းတောင်းသည်။
Public Service Announcement
ထို့အပြင် အကြမ်းဖက်စစ်အာဏာရှင်များ အာဏာသိမ်းပြီးနောက်ပိုင်း ချင်းပြည်နယ်သည် ထိခိုက်မှုအများဆုံးဖြစ်ခဲ့ပြီး ချင်းတိုင်းရင်းသားတို့သည်လည်း ဥပဒေမဲ့ ဖမ်းဆီးသတ်ဖြတ်ခံနေရခြင်း၊ နေအိမ်နှင့် ပိုင်ဆိုင်မှုတို့ မီးရှို့ဖျက်ဆီးခဲ့နေခြင်းတို့ကြောင့် ဘေးလွတ်ရာသို့ ထွက်ပြေးတိမ်းရှောင်ရင်း အခက်အခဲများစွာဖြင့် ရင်ဆိုင်ကြုံတွေ့နေရကြောင်း CRPH ၏ သဝဏ်လွှာတွင် ဖော်ပြ သည်။
ယင်းသို့ အခက်အခဲ၊ ဒုက္ခများစွာဖြင့် ရင်ဆိုင်နေကြရသော်လည်း စစ်အာဏာရှင် ဆန့်ကျင်ရေးအတွက် တော်လှန်ရေးတပ်ဦးတွင် ချင်းတိုင်းရင်းသားပြည်သူလူထုတို့၏ စည်းလုံးညီညွတ်မှု၊ ရဲရင့်ပြင်းပြသော စိတ်ဓာတ်၊ ခိုင်မာသော ယုံကြည်ချက်၊ ဖြောင့်မတ်သော ဦးတည်ချက်များကိုလေးစားစွာ အသိအမှတ်ပြုကြောင်း CRPH ကဖော်ပြသည်။
