မကွေးတိုင်း ပခုက္ကူမြို့နယ် ဂဝံလေးတိုင်ကျေးရွာ စာသင်ကျောင်း၌ တပ်စွဲထားသည့် အကြမ်းဖက်စစ်ကောင်စီတပ်ကို ယနေ့ နေ့လယ်က သွားရောက်တိုက်ခိုက်ခဲ့ကြောင်း ပခုက္ကူ ပြည်သူ့ကာကွယ်ရေးတပ်(PDF)က သတင်းထုတ်ပြန်သည်။
မတ်လ ၂၁ ရက် နေ့လယ်ပိုင်းတွင် အင်အား ၃၀ခန့်ရှိ စစ်ကောင်စီတပ်ကို ပခုက္ကူ PDF၊ မြစ်ခြေနှင့် ကျွန်းချောင်း ကာကွယ်ရေးတပ်၊ King Fighter နှင့်ပေါက်မဟာမိတ်တပ်ဖွဲ့တို့ ပူးပေါင်း၍ ဝင်ရောက်တိုက်ခိုက်ခဲ့သည်ဟု ဆိုသည်။
၁နာရီကြာ အပြန်အလှန် ပစ်ခတ်မှု ဖြစ်ပွားခဲ့ပြီး စစ်ကောင်စီတပ်မှ လက်နက်ကြီးများ ရမ်းသမ်းပစ်ခတ်ခဲ့ကြောင်း၊ ယင်းတိုက်ပွဲဖြစ်ရာနေရာသို့ စစ်ကူပေးရန်လာသည့် စစ်ကောင်စီကားတစ်စီးကိုလည်း ဆီကောင်း – ဂဝံလေးတိုင် လမ်းတစ်နေရာ၌ မိုင်းဆွဲတိုက်ခိုက်ခဲ့ကြောင်း ဖော်ပြထားသည်။
ထိတွေ့မှု ဖြစ်စဉ်များ၌ စစ်ကောင်စီတပ်မှ ၆ဦးခန့် သေဆုံးခဲ့ကြောင်း ကနဦး သတင်းရရှိခဲ့ပြီး ကာကွယ်ရေးပူးပေါင်းတပ်မှ ရဲဘော်တစ်ဦး ဒဏ်ရာရခဲ့ကြောင်း သတင်းထုတ်ပြန်ခဲ့သည်။
ပခုက္ကူ PDF သည် ဒေသတွင်း ကာကွယ်ရေးတပ်များနှင့် ပူးပေါင်းပြီး စစ်ကောင်စီတပ်ကို တိုက်ခိုက်မှုများ ယခင်ကလည်း လုပ်ဆောင်ခဲ့သည်။