မြန်မာစစ်တပ် လူမျိုးသုဉ်းသတ်ဖြတ်​ကျူးလွန်ကြောင်း အမေရိကန်သတ်မှတ်ဆုံးဖြတ်မှု ICJ၊ ICC အပါအဝင် နိုင်ငံတကာတရားစီရင်ရေးများတွင် အထောက်အပံ့ဖြစ်မည်ဟု CRPH ယုံကြည်

မြန်မာစစ်တပ်က ရိုဟင်ဂျာလူမျိုးသုဉ်းသတ်ဖြတ်မှုကျူးလွန်ကြောင်း အမေရိကန်၏ သတ်မှတ်ချက်သည် ICJ ၊ ICC အပါအဝင် နိုင်ငံတကာတရားရေးအဖွဲ့အစည်းများ၌ တရားမျှတမှုရှာဖွေရေးအတွက် များစွာအထောက်အပံ့ဖြစ်စေမည်ဟု ပြည်ထောင်စုလွှတ်တော်ကိုယ်စားပြုကော်မတီ(CRPH)က ထုတ်ပြန်သည်။

သက်သေများ၊ အထောက်အထားများနှင့် နိုင်ငံတကာ လွတ်လပ်သော လူ့အခွင့်အရေး အဖွဲ့အစည်းများ၏ အစီရင်ခံစာများအပေါ် အခြေခံ၍ မြန်မာစစ်တပ်၏ ရိုဟင်ဂျာများအပေါ် ကျူးလွန်ခဲ့သည့် ရာဇဝတ်မှုများသည် လူမျိုးတုံး သတ်ဖြတ်မှု၊ လူသားမျိုးနွယ်အပေါ် ကျူးလွန်သော ရာဇဝတ်မှုများ ဖြစ်ကြောင်း အမေရိကန်အစိုးရ၏ ဆုံးဖြတ်သတ်မှတ်မှုအပေါ် CRPH က ကြိုဆိုသည်။

လက်ရှိကျူးလွန်နေဆဲ မြန်မာစစ်တပ်၏ အကြမ်းဖက်မှုများသည် ရိုဟင်ဂျာများအပေါ် အလားတူရာဇဝတ်မှုများကို ကျူးလွန်ခဲ့သော၊ ကျူးလွန်နေဆဲဖြစ်သော စစ်တပ်ပင်ဖြစ်သည်ကို ထပ်မံမီးမောင်းထိုးပြလိုက်ခြင်းဖြစ်ပြီး အဆိုပါရာဇဝတ်မှုများ ဆက်လက်ကျူးလွန်နိုင်ခြင်းမရှိစေရန် တားဆီးနိုင်ရေးအတွက် ဝိုင်းဝန်းကူညီကြိုးစားပေးကြရန် CRPH က တောင်းဆိုသည်။

ထို့အပြင် ကမ္ဘာ့နိုင်ငံများအနေဖြင့် ယူကရိန်းနိုင်ငံသားများအပေါ် ကျူးလွန်လျှက်ရှိသော ကျူးကျော်သူများ၏ ရာဇဝတ်မှုများကို ဝိုင်းဝန်းဆန့်ကျင်ဟန့်တားနေကြသည့်နည်းတူ မြန်မာနိုင်ငံရှိ အာဏာရှင်များ၏ လူမဆန်သော ရာဇဝတ်မှုများ ကျူးလွန်လျက်ရှိခြင်းကိုလည်း မေ့လျော့ပစ်ပယ်ထားခြင်းမရှိဘဲ ဆက်လက်အရေးယူဆောင် ရွက်သွားရန် CRPHက တိုက်တွန်းသည်။

Public Service Announcement