နိုင်ငံခြားကုန်သွယ်မူဘဏ်မှ ဝန်ထမ်း ၂၁၂ ဦးကို အမည်ပျက်စာရင်း(Blacklist) သွင်းလိုက်ပြီး ဝန်ထမ်းအဖြစ်မှ ထုတ်ပစ်လိုက်ကြောင်း အမျိုးသားညီညွတ်ရေးအစိုးရအဖွဲ့က ယနေ့ထုတ်ပြန်လိုက်သည်။
ထိုထဲတွင် သန့်ရှင်းရေးမှ ဒုတိယအထွေထွေမန်နေဂျာရာထူးအထိ့အဆင့် ၁၆ မျိုးပါဝင်ပြီး ၎င်းတို့သည့် ပြည်သူလူထုကို အကြမ်းဖက်နှိပ်စက်လျက်ရှိသော စစ်ကောင်စီယန္တားရား လည်ပတ်နိုင်ရေးအတွက် ပူးပေါင်းပါဝင် ဆောင်ရွက်လျက်ရှိသောကြောင့်ဖြစ်သည်ဟုဖော်ပြထားသည်။
NUG ၏စီမံကိန်း၊ဘဏ္ဍာရေးနှင့် ရင်းနှီးမြှပ်နှံမူဝန်ကြီးဌာနကထုတ်ပယ်သည့် နိုင်ငံခြားကုန်သွယ်မူဘဏ်ဝန်ထမ်းစာရင်းတွင် ဒုတိယအထွေထွေမန်နေဂျာ ၆ယောက်၊ လက်ထောက်အထွေထွေမန်နေဂျာ ၇ ယောက်၊ မန်နေဂျာ ၁၇ယောက်၊ လက်ထောက်မန်နေဂျာ ၂၇ ယောက်၊ ငွေကိုင်ချုပ် တစ်ယောက်၊ ကြီးကြပ်ရေးမှူး ၄၁ ယောက်၊ ငွေကိုင် ၇ ယောက်၊ ဒုတိယကြီးကြပ်ရေးမှူး ၄၁ယောက်စသည့်တို့ပါဝင်သည်။
ထိုပြင် အကြီးတန်း၊ အငယ်တန်းစာရေးများ၊ လုံခြုံရေး၊ရုံးအကူ၊ ယာဉ်မောင်းနှင့် သန့်ရှင်းရေးများကိုပါ ဝန်ထမ်းအဖြစ်က NUGက ထုတ်ပယ်လိုက်ခြင်းဖြစ်သည်။
Public Service Announcement
၎င်းတို့သည် စစ်ကောင်စီလက်အောက်တွင် တာဝန်ထမ်းဆောင်နေပြီး CDMဝန်ထမ်းများကို ဖိနှိပ်ခြင်း၊ ခြိမ်းခြောက်ခြင်းနှင့် ရာထူးမှ ထုတ်ပယ်ခြင်း၊ ဝန်ထမ်းအဖြစ်မှ ထုတ်ပယ်ခြင်းနှင့် ပြည်သူ့အစိုးရချေးပေးထားသည့်ချေးငွေများကို ပြန်လည်တောင်းခံခြင်းနှင့် အခြားသော ဖိနှိပ်မူများ ပြုလုပ်ခဲ့သည်ဟုပါရှိသည်။
နိုင်ငံခြားကုန်သွယ်မူဘဏ်သည် အစိုးရပိုင်ဘဏ်လုပ်ငန်းတစ်ခုဖြစ်ပြီး စစ်အုပ်စုကအာဏာသိမ်းပြီးနောက်စစ်ကောင်စီအတွက် နိုင်ငံခြားငွေအဓိကရှာဖွေပေးနေသည့် ဘဏ်လုပ်ငန်းတစ်ခုဖြစ်သည်။
