မကွေးတိုင်း မြိုင်မြို့နယ်ရှိ ဗဟင်းရဲစခန်းကို ဝင်တိုက်ရာ စစ်ကောင်စီတပ်သား ကိုးဦးသေဆုံးကြောင်း ပြည်သူ့တော်လှန်ရေးတပ်မတော်(PRA)ဦးဆောင်သူ ဗိုလ်ဂျပန် က People’s Spring သို့ ပြောသည်။
အကြမ်းဖက်စစ်ကောင်စီကို တော်လှန်ရန် PRA ဖွဲ့စည်းမှု တစ်နှစ်ပြည့် ယနေ့တွင် ရဲစခန်းတစ်ခု သိမ်းနိုင်ရန် ကြိုးပမ်းခဲ့သော်လည်း စစ်ကောင်စီ၏ လေယာဥ်စစ်ကူကြောင့် ပြန်လည်ဆုတ်ခွာခဲ့ရသည်ဟု ၎င်းက ဆိုသည်။
“တိုက်ပွဲက ၁၁ နာရီ ၄၅ မိနစ်လောက်မှာစတယ်။ ညနေ လေးနာရီမှ ပြီးတယ်။ ၃ နာရီခွဲလောက်မှာ လေယာဥ် ပစ်ကူလာတယ်။နာရီဝက်နီးပါးလောက် လေယာဥ် ပစ်ကူကို တောင့်ခံခဲ့ရတယ်။ရဲဘော်နှစ်ဦး ဒဏ်ရာရခဲ့တယ်”ဟု ဗိုလ်ဂျပန်က ရှင်းပြသည်။
ဝင်ရောက်တိုက်ခိုက်ခဲ့သည့် ဗဟင်းရဲစခန်းတွင် စစ်ကောင်စီ၏ ရဲနှင့် စစ်သား အင်အား ၆၃ဦးရှိသည်ဟု သိရသည်။
Public Service Announcement
တိုက်ပွဲအတွင်း PRA နှင့် အတူ နယ်မြေခံပြည်သူ့တပ်ဖွဲ့များမှ ရဲဘော်အင်အား ၃၀၀ ဝန်းကျင်ဖြင့် စစ်ကောင်စီကို ပိတ်ဆို့ တိုက်ခိုက်ခဲ့ကြောင်း လည်း PRA ဦးဆောင်သူက ဆိုသည်။
