▪️မတ်လ ၃၁ရက်တွင် ရိုးရာအရ ရုပ်အလောင်းကို သင်္ဂြိုလ်မည်
ကိုးကန့်လက်နက်ကိုင်တပ်(MNDAA) တည်ထောင်သူ ဦးဖုန်ကြားရှင်၏ ဈာပနအခမ်းအနားကို ၎င်းကွယ်လွန်ပြီး ရက်ပေါင်း ၄၀ကျော်အကြာ မတ်လ ၂၉ရက်တွင် မိုင်းလားလက်နက်ကိုင်အဖွဲ့(NDAA)နယ်မြေ၌ ကျင်းပခဲ့ရာ လူဦးရေ သုံးထောင်ခန့် တက်ရောက်ခဲ့သည်။
အသက် ၉၄နှစ်အရွယ်ရှိပြီဖြစ်သော MNDAA ဥက္ကဋ္ဌ ဟောင်းဖြစ်သူ ဦးဖုန်ကြားရှင်သည် ဖေဖော်ဝါရီ ၁၆ရက်တွင် ကွယ်လွန်ခဲ့ခြင်းဖြစ်သည်။
“ဈာပနအခမ်းအနားထဲကို တက်ရောက်တဲ့ လူဦးရေက ၂၅၀၀ လောက်ရှိတယ်။ ဘေးက ကြည့်တဲ့လူတွေနဲ့ ပေါင်းရင်တော့ ၃၀၀၀ နီးပါးလောက်ရှိမယ်။ ကိုဗစ်ရောဂါကြောင့်မို့လို့ ထိပ်သီးခေါင်းဆောင်တွေမလာကြပေမယ့် ကျွန်တော်တို့ မဟာမိတ် ညီနောင်အဖွဲ့အစည်းတွေ အားလုံးတော့ တက်ရောက်ပါတယ်ဗျ” ဟု MNDAA တပ်ဖွဲ့ဝင်တစ်ဦးက ပြောပြသည်။
Public Service Announcement
အဆိုပါ စျာပနအခမ်းအနားသို့ မြောက်ပိုင်းမဟာမိတ်အဖွဲ့မှတိုင်းရင်း သားလက်နက်ကိုင်းအဖွဲ့ခေါင်းဆောင်များလည်း စတက်ရောက်ခဲ့ကြသည်။ထိုအပြင် ကရင်နီအမျိုးသားကာကွယ်ရေးတပ်(KNDF)မှခေါင်းဆောသ်များလည်းတက်ရောက်ခဲ့သည်။
MNDAAနှင့် တိုက်ပွဲများအပြင်းအထန်ဖြစ်ထားသောအကြမ်းဖက်စစ်ကောင်စီ၏ တြိဂံဒေသတိုင်း စစ်ဌာနချုပ်က တိုင်းမှူးအပါအဝင် ကိုယ်စားလှယ်နှစ်ဦးတက်ရောက်ခဲ့သည်။
“၂၉ရက်နေ့မှာ ဈာပန အခမ်းအနားကျင်းပတယ်။ ပြီးတော့ ၃၀ရက်မှာလည်း ဥက္ကဋ္ဌ အိမ်မှာတော့ ဧည့်သည်တွေ ကတော့ရှိတယ်။ ၃၁ရက်နေ့မှာကြတော့ တောင်တက်ပြီးတော့ သူ့ကို သင်္ချိုင်းချတာပေါ့။ကျွန်တော်တို့ တရုတ်ရိုးရာကျတော့ သစ်သားသေတ္တာထဲမှာထည့်ပြီး မြေမြှုပ်တာ”ဟု MNDAA တပ်ဖွဲ့ဝင် တစ်ဦးက ပြောသည်။
ဦးဖုန်ကြားရှင်၏ ရုပ်အလောင်းကို မပျက်မစီးအောင် စီမံထားခြင်းဖြစ်ကြောင်းလည်း ၎င်းက ဆိုသည်။
“ဈာပနအခမ်းအနားအတွက် ပြင်ဆင်တာကလည်း ရက်ပေါင်း ၄၀ကျော်ရှိပြီလေ။ ရေခဲသေတ္တာနဲ့ ကောင်း ကောင်းထည့်ပြီး သူ့ရုပ်ရည်ပုံမှန်ဖြစ်အောင် ထိန်းသိမ်းထားတာပေါ့” MNDAA တပ်ဖွဲ့ဝင်က ပြောသည်။
ဦးဖုန်ကြားရှင်၏ ဈာပန ကျင်းပရေးကော်မတီကို ၀အဖွဲ့(UWSA)၊ မိုင်းလားအဖွဲ့(NDAA)၊ ရခိုင်အဖွဲ့(AA)၊ ရှမ်းအဖွဲ့(SSPP)၊ တအာင်းအဖွဲ့(TNLA)၊ ကချင်အဖွဲ့(KIA)၊ ကိုးကန့်အဖွဲ့(MNDAA) ထိပ်သီးခေါင်းဆောင်များဖြင့် ဖွဲ့စည်းထားခြင်းဖြစ်သည်။
