စစ်ကိုင်းတိုင်း၊ မင်းကင်းမြို့နယ် တောင်တွင်းဒေသအထက်ပိုင်းတွင် အကြမ်းဖက်စစ်ကောင်စီ တပ်နှင့် ပျူစောထီးများက အင်အားအလုံးအရင်းဖြင့် ကျေးရွာများအား စစ်ကြောင်းထိုး အကြမ်းဖက်မှုများပြုလုပ်နေ၍ ကျေးရွာ၁၀ ရွာမှ ထောင်နှင့်ချီ သောဒေသခံများမှာ ထွက်ပြေးတိမ်းရှောင်နေရကြောင်း ဒေသခံများက ပြောသည်။
အကြမ်းဖက်စစ်ကောင်စီတပ်သည် မတ်လကုန်ပိုင်းတွင် မင်းကင်းနယ် တောင်တွင်းဒေသသို့ အင်အား ၃၀၀ခန့်ဖြင့် စစ်ကြောင်းထိုးခဲ့ပြီး အပြစ်မဲ့ပြည်သူ များအား ဖမ်းဆီးသတ်ဖြတ်ခြင်း၊ လူနေအိမ်များမီးရှို့ဖျက်ဆီးခြင်း၊ တန်ဖိုးရှိပစ္စည်းများအား သိမ်းယူခြင်းများ ပြုလုပ်ခဲ့ကြောင်း ဒေသခံများက ပြောသည်။
တိမ်းရှောင်နေရသည့်ကျေးရွာ ၁၀ရွာထက်မနည်းရှိပြီး ဒေသခံပြည်သူ ခုနှစ်ထောင်ကျော် ထွက်ပြေးတိမ်းရှောင်နေရကြောင်း၊ နေရေးထိုင်ရေး အခက်အခဲနှင့် စားနပ်ရိက္ခာအခက်အခဲများ ကြုံတွေ့နေရကြောင်း ဒေသခံများ က ပြောသည်။
“သစ်ခေါင်းတီးဘက်ဆို စပါးတင်းနှစ်ရာလောက်ပါတင်ပြီး လူနေအိမ်ဆယ်လုံး လောက်လည်း မီးရှို့ခံရတယ်။ စစ်ဘေးရှောင်စခန်းတွေအဝတ်စားတွေပါမီးရှို့ပစ် တယ်တဲ့။ တောင်တွင်း အထက်ပိုင်း ဒေသခံ အကုန်ပြေးနေရတယ်။ သူတို့ကနယ်မြေစိုးမိုးမှု လုပ်တဲ့သဘောကိုမှ ရတာယူပြီးရင်ဖျက်ဆီးတာတွေလုပ်နေတာ။ သူတို့ပြန်မဆုတ်ဘဲ ဒီအတိုင်းသာ ဝင်နေရင် ဒေသခံတွေ အကုန်ဒုက္ခရောက်မှာ။”ဟု နယ်မြေချင်းဆက်နေသည့် Kani Peoples Defence Force – KPDF 2မှ သတင်းတာဝန်ခံက ပြောသည်။
Public Service Announcement
မင်းကင်းနှင့်ကနီနယ်များတွင် အကြမ်းဖက်စစ်ကောင်စီတပ်နှင့် ပြည်သူ့ ကာကွယ်ရေး အဖွဲ့များကြား တိုက်ပွဲများမကြာခဏဖြစ်ပွားနေပြီး ကျေးရွာများရှိ ဒေသခံများမှာ ထွက်ပြေးတိမ်းရှောင်နေရသည်။
