မြန်မာစစ်တပ်၏ လက်နက်ရရှိနိုင်ရေးလမ်းကြောင်းများကို ပိတ်ဆို့ခြင်းဖြင့် အပြစ်မဲ့မြန်မာပြည်သူများ၏ အသက်များကို ကယ်တင်ပေးရန် ကုလ သမဂ္ဂအဖွဲ့ဝင်နိုင်ငံများကို သံအမတ်ကြီး ဦးကျော်မိုးထွန်းက တောင်းဆိုသည်။
ဧပြီ ၅ ရက်တွင် ကျင်းပပြုလုပ်သည့် ကုလသမဂ္ဂလက်နက်ဖျက်သိမ်းရေး ကော်မရှင်၏ အထွေထွေဆွေးနွေးမှုအစီအစဉ်၌ မြန်မာသံအမတ်ကြီးက မိန့်ခွန်းပြောကြားရာ မြန်မာစစ်တပ်သို့ လက်နက်များနှင့် ဆက်စပ်နည်းပညာများ ရောင်းချနေသော နိုင်ငံများကို တားမြစ်ပေးရန်နှင့် လက်နက်ရရှိနိုင်ရေး လမ်းကြောင်းများကို ပိတ်ဆို့ပေးရန် အဖွဲ့ဝင်နိုင်ငံများက ပူးပေါင်းဆောင်ရွက်ပေးကြရန် တိုက်တွန်းခဲ့သည်။
မြန်မာစစ်တပ်သည် ပြည်ပမှတင်သွင်းသော စစ်လက်နက်များကို အသုံးပြု၍ မြန်မာ ပြည်သူများအပေါ် အကြမ်းဖက်သတ်ဖြတ်မှုများကို ရက်စက်စွာ ကျူးလွန်နေပြီး ကုလသမဂ္ဂ အထွေထွေညီလာခံနှင့် လူ့အခွင့်အရေးကောင်စီ တို့မှ တိုက်တွန်းထားသည့်အတိုင်း မြန်မာစစ်တပ်သို့ လက်နက်များရောင်းချနေ သည့် နိုင်ငံများအနေဖြင့် ရောင်းချနေမှုများကို ချက်ချင်းရပ်တန့်ပေးရန် သံအမတ်ကြီးက ထပ်မံတောင်းဆိုသည်။
စစ်တပ်၏ လူမဆန်စွာ တိုက်ခိုက်သတ်ဖြတ်မှုများကြောင့် ဆိုးဝါးသော ဒုက္ခဆင်းရဲများ ခံစားနေရသည့် မြန်မာပြည်သူများအတွက် ကုလသမဂ္ဂ အဖွဲ့ဝင်နိုင်ငံများအနေဖြင့် အရေးယူမှုများကို အချိန်မီ ပြတ်ပြတ်သားသား ဆောင်ရွက်ပေးရန်လည်း သံအမတ်ကြီးက တောင်းဆိုခဲ့သည်။
ထို့အပြင် မြန်မာနိုင်ငံအနေဖြင့် ဒုက္ခဆင်းရဲများ ရင်ဆိုင်နေရသည့် ယူကရိန်း ပြည်သူများ၏ ခံစားမှုများကို အပြည့်အဝနားလည်ကာ ယူကရိန်းပြည်သူများနှင့် အတူ ခိုင်မာစွာရပ်တည်ကြောင်းနှင့် ယူကရိန်းအပေါ် ကျူးကျော်တိုက်ခိုက်နေမှု များကို ချက်ချင်းရပ်တန့်ပေးရန် ဦးကျော်မိုးထွန်းက တောင်းဆိုခဲ့သည်။