ယမန်နေ့ (ဧပြီ၅ ရက်) ည ၇နာရီမှ ၉နာရီအထိ မုံရွာမြို့ ကားလေးကွင်းမီးပွိုင့်၊ ဒေါင်းကျောင်းထောင့်၊ မီးရထားဘူတာရုံအနီး၊ မြို့ပတ်လမ်းတစ်နေရာနှင့် ပြည်ထောင်စုလမ်းယာဥ်ထိန်းရုံး အစရှိသည့် အကြမ်းဖက်စစ်ကောင်စီတပ်စွဲထားသောနေရာများအား Unity Force Monywa နှင့် Brother Defense Force ရဲဘော်များမှ လက်ပစ်မိုင်းများဖြင့် ပစ်ပေါက်ဖောက်ခွဲခဲ့ကြောင်း ၎င်းအဖွဲ့များက အသိပေးသည်။
မြို့ပတ်လမ်းတစ်နေရာနှင့် ယာဥ်ထိန်းရုံးရှိ စစ်ကောင်စီတပ်များအား လက်ပစ်ဗုံး အကြီးစားများဖြင့် ပစ်ခတ်တိုက်ခိုက်ခဲ့ကြောင်း၊ အဆိုပါအကြမ်းဖက်စစ်တပ်သည် ပြည်သူလူထုအား မတရားအနိုင်ကျင့်ဖိနှိပ်မှုများ ပြုလုပ်နေသည်ဟု ပြည်သူများထံမှ သိရှိရကြောင်း၊ ရဲဘော်များ လုံခြုံရေးအရစစ်ကောင်စီဘက်မှ ထိခိုက်သေဆုံးမူအခြေအနေမသိရှိရသေးကြောင်း၊ရဲဘော်များ ဘေးကင်းလုံခြုံသောနေရာသို့ ပြန်လည်ရောက်ရှိကြောင်း၊ သင်္ကြန်ပွဲကာလတွင် ပြည်သူများအနေဖြင့် လမ်းမများပေါ်သို့ သွားလာမှု ရှောင်ရှားကြပါရန် အထူးမေတ္တာရပ်ခံအပ်ကြောင်း Unity Force Monywa က အသိပေးသည်။
ယမန်နေ့ ညဦးပိုင်း ည ၇နာရီ ၁၅မိနစ်အချိန်က မုံရွာမြို့ အမြင့်လမ်းခွဲတွင် ကင်းပုန်းဝပ်နေသော စစ်ကောင်စီတပ်အား လက်ပစ်ဗုံးတစ်လုံးဖြင့်လည်းကောင်း၊ နောက်ထပ် ၃မိနစ်ခန့်အကြာ ဘိုးဘွားရိပ်သာအဝိုင်းတွင် ကင်းပုန်းဝပ်နေသော စစ်ကောင်စီတပ်အား လက်ပစ်ဗုံးတစ်လုံးတို့ဖြင့် ပစ်ခတ်တိုက်ခိုက်ခဲ့ကြောင်း ဒဿ Monywa PDF ပြောက်ကျားတပ်ဖွဲ့က သတင်းထုတ်ပြန်ထားသည်။
