ပဲခူးတိုင်း၊သက္ကလမြို့တွင် ဆယ်တန်းစာမေးပွဲလာဖြေသည့် ကျောင်းသူတစ်ဦး၏ မိခင်ကို အာဏာသိမ်းစစ်ကောင်စီတပ်ဖွဲ့၏သေနတ်ကျည်ထိမှန်သွားသည်ဟု ဒေသခံများကပြောသည်။
ကဝမြို့နယ်တွင်ပါဝင်သောသက္ကလမြို့အထက်တန်းကျောင်းတွင်ယနေ့ (ဧပြီလ၆ရက်) နံနက် ဆယ်နာရီခန့်တွင် စစ်ကောင်စီက ပြုလုပ်သည့် စာမေးပွဲကျင်းပနေစဥ် ကျောင်းရှေ့၌ အမျိုးသမီးတစ်ဦး သေနတ်ကျည်ထိမှန်ခဲ့ခြင်းဖြစ်သည်။စစ်ကောင်စီတပ်သားကိုင်ဆောင်ထားသည့် သေနတ်မှ ကျည်ထွက်သွား၍ ဆယ်တန်းကျောင်းသူတစ်ဦး၏ မိခင်ဒဏ်ရာရသွားကြောင်း ပြည်သူ့ကာကွယ်ရေးအဖွဲ့၏ သတင်းထုတ်ပြန်ရေးစာမျက်နှာ Bago Nway Oo Channel က သတင်းထုတ်ပြန်ထားသည်။
စစ်ကောင်စီတပ်သားက တမင်ပစ်ခြင်းလား၊ မတော်တဆဖြစ်ခြင်းလားဆိုသည်ကို တိတိကျကျမသိရသေးပေ။သေနတ်ကျည်မှန်၍ ဒဏ်ရာရ အမျိုးသမီးကို သက္ကလဆေးရုံသို့ ပို့ဆောင်ထားသည်ဟု ဒေသခံအချို့ကပြောသည်။
အကြမ်းဖက်စစ်ကောင်စီက ပြုလုပ်နေသည့် ဆယ်တန်းစာမေးပွဲကို ပြည်သူအများစုက သပိတ်မှောက်ထားပြီး ယခင်နှစ်ကျောင်းသားဦးရေ၏ သုံးပုံတစ်ပုံခန့်သာ ဝင်ရောက်ဖြေဆိုနေသည်။ တက္ကသိုလ်ဝင်တန်း ဖြေဆိုသူကျောင်းသူကျောင်းသားဦးရေသည် ပုံမှန်အားဖြင့် နှစ်စဥ် ရှစ်သိန်းမှ ကိုးသိန်းကြားရှိသော်လည်း ယခုနှစ်တွင် နှစ်သိန်းရှစ်သောင်းခန့်သာ ရှိသည်။
အာဏာသိမ်းစစ်ကောင်စီတပ်က ပြုလုပ်နေသည့်ဆယ်တန်းစာမေးပွဲကို အသိအမှတ်ပြုမည်မဟုတ်ကြောင်းအမျိုးသားညီညွတ်ရေးအစိုးရ (NUG)ကထုတ်ပြန်ထားသည်။