အရပ်ဖက်အရေးလှုပ်ရှားသည့် ပလက်ဝမြို့ခံ ရခိုင်တိုင်းရင်းသားတစ်ဦးကို အကြမ်းဖက်စစ်ကောင်စီက ဖမ်းဆီးပြီးနောက် ထောင်ဒဏ် သုံးနှစ်ချမှတ်လိုက်သည်။
ပလက်ဝမြို့ခံ ကိုတင်ထွန်းအောင်ကို အကြမ်းဖက်စစ်ကောင်စီက ဖမ်းဆီးပြီး ပုဒ်မ၅၀၅-က ဖြင့် တရားရုံးတင်စစ်ဆေးကာထောင်ဒဏ် ၃နှစ်ချမှတ်လိုက်ခြင်းဖြစ် သည်။
“စစ်အစိုးရက တမင်သက်သက် ပြဿနာကို မီးမွှေးရှာနေတာ။ ကိုတင်ထွန်းအောင်မှာ အပြစ်မရှိဘဲ ဖမ်းတယ်။ အခု ထောင်ချတယ်။ရခိုင်အဖွဲ့အစည်းတွေ၊ ရခိုင်ပါတီတွေ ဒီပြဿနာကို ဝင်ရှင်းပေးဖို့လိုမယ်”ဟု ကိုတင်ထွန်းအောင်၏မိတ်ဆွေတစ်ဦးက ပြောသည်။
ကိုတင်ထွန်းအောင်ကို ၂၀၂၁ ဒီဇင်ဘာ ၂၈ရက်တွင် အကြမ်းဖက်စစ်ကောင်စီက ဖမ်းဆီးသွားပြီးနောက် ဧပြီ ၅ရက်တွင် အမိန့်ချလိုက်ခြင်းဖြစ်သည်။ ကိုတင်ထွန်းအောင်သည် ပလက်ဝဒေသတွင် ၂၀၂၀ ရှေ့ပိုင်းကာလများက စစ်တပ်နှင့် AAတိုက်ပွဲများကြောင့် စစ်ဘေးကြုံတွေ့ရသည့် ဒေသခံများကို အကူအညီများစွာ ပေးခဲ့သူဖြစ်သည်။ လူမှုကူညီရေးလုပ်သူအဖြစ် လူသိများပြီး စစ်ကောင်စီ၏ ယခုလုပ်ရပ်ကို ရခိုင်တိုင်းရင်းသားများက မကျေမနပ်ဖြစ်နေသည်။
Public Service Announcement
ရခိုင်တပ်မတော်(AA)ကလည်း အကြမ်းဖက်စစ်ကောင်စီသည် ရခိုင်ပြည်နယ်အတွင်း အုပ်ချုပ်ရေးနှင့် တရားစီရင်ရေး လုပ်ငန်းများကို ကန့်ကွက်နှောင့်ယှက်မှု များ ပြုလုပ်နေပြီး စစ်ရေးအရ ထိပ်တိုက်တွေ့ဆုံမှုများ ရှိလာနိုင်ကြောင်းမကြာသေးမီက သတိပေးထားသည်။
ဧပြီ ၅ ရက်က ပြုလုပ်သည့်သတင်းစာရှင်းလင်းပွဲတွင် AA၏ ပြန်ကြားရေး တာဝန်ခံခိုင်သုခက အထက်ပါအတိုင်း သတိပေးခဲ့ခြင်းဖြစ်သည်။
“မြန်မာစစ်တပ်နဲ့ ULA/ AA ဦးဆောင်တဲ့ ရခိုင်ပြည်သူ့အစိုးရကြား တင်းမာမှုတွေ ဒီလပိုင်းမှာ မြင့်တက်လာတာ ရှိပါတယ်။ တင်းမာမှုကို လျှော့ချပြီးတော့ ထိပ်တိုက် ရင်ဆိုင်မှု မဖြစ်ဖို့ ကျွန်တော်တို့ ကြားလူတွေက တစ်ဆင့် အပြန်အလှန် စကားပြောနေတာတွေ ရှိတယ်။ သို့သော် လည်း စစ်တပ်ဘက်က ဒီလိုမျိုး ဆက်လုပ် လာမယ် ဆိုရင် ဒီကိစ္စဟာ တင်းမာမှုနေတစ်ဆင့် ထိပ်တိုက်ရင်ဆိုင်မှုထိ မရောက်လာနိုင်ဘူးလို့ မပြောနိုင်ဘူး။ အဲဒီအတွက်နဲ့ ဒီကိစ္စ တွေကို မြန်မာစစ်တပ်ဘက်ကလည်း သတိထားပြီးတော့ လုပ်ဆောင်ဖို့ လိုတယ်” ဟုဆိုသည်။
စစ်ကောင်စီသည် ULA/ AA ၏ အုပ်ချုပ်ရေးနှင့် တရားစီရင် လုပ်ငန်းများအပေါ် တောက်လျှောက် ကန့်ကွက်မှုများ လုပ်ဆောင်နေသလို မြေပြင်တွင်လည်း စစ်ရေး အင်အားဖြင့် ဖိအားပေးနှောင့်ယှက်နေသည်ဟုခိုင်သုခက ပြောထားသည်။
စစ်အာဏာသိမ်းမှုအား ပြည်သူနှင့်အတူ AAပူးပေါင်းပါဝင်လာမည်ကို စိုးရိမ်နေသည့် အကြမ်းဖက်စစ်ကောင်စီက AA ခေါင်းဆောင်ပိုင်းကို မျက်နှာအောက်ချဆက်ဆံနေသည့်ကြားမှ ယခုအခါ တင်းမာမှု စတင်လာခြင်းဟု နိုင်ငံရေးလေ့လာသုံးသပ်သူတစ်ဦးက မှတ်ချက်ပြုသည်။
ဗိုလ်ချုပ်ထွန်းမြတ်နိုင်၏ ဦးဆောင်မှုအောက်တွင် စုစည်းအားကောင်းနေသည့် AAအနေဖြင့် နိုင်ငံတော်အာဏာကို မတရားသိမ်းယူထားသည့် စစ်ကောင်စီကို KNU၊ KIA၊PDFများနှင့် လက်တွဲကာ အတူတူပူးပေါင်းတိုက်ခိုက်ရန် ပြည်သူလူထုက လိုလားနေသည်။
