▪️ပြည်သူများ ပစ်ခတ်ဖမ်းဆီးခံရခြင်းနှင့် လမ်းဖယ်မပေးသောကြောင့် စိတ်မကောင်းဖြစ်ရဟုဆို
ဗုဒ္ဓကလျာဏယုဝအသင်း (YMBA)အသင်းရှေ့ရှိ စစ်ကောင်စီဂိတ်ကို တိုက်ခိုက်ခဲ့ရာ အကြမ်းဖက်စစ်ကောင်စီတပ်ဖွဲ့ဝင်များ သေဆုံးမှုရှိနိုင်ကြောင်း Civil Guerrilla Force-YGN ကသတင်းထုတ်ပြန်သည်။
ဧပြီ ၁၃ရက် ည ၇နာရီခွဲအချိန်ခန့်တွင် တိုက်ခိုက်ခဲ့ခြင်းဖြစ်ပြီး Civil Guerrilla Force -YGN နှင့် Yangon Federal Army -YFA တို့ပူးပေါင်းတိုက်ခိုက်ခဲ့ကြောင်း သတင်းထုတ်ပြန်သည်။
ယင်းဖြစ်စဉ်တွင်ပါဝင်သည့် တပ်ဖွဲ့ဝင်အားလုံးဘေးကင်းရာသို့ ရောက်ရှိပြီဖြစ်ပြီး အပြစ်မဲ့ပြည်သူများကို ပစ်ခတ်ဖမ်းဆီးမှုများရှိသည်ဟု ကြားရသောကြောင့် စိတ်မကောင်းရကြောင်း ထုတ်ပြန်ချက်၌ ဖော်ပြထားသည်။
Public Service Announcement
“အပြစ်မဲ့ပြည်သူများကို ပစ်ခတ်ဖမ်းဆီးနေကြောင်းကြားသိရ၍ စိတ်မကောင်းများစွာဖြစ်ရပြီး မိမိတို့မှ တောင်းပန်အပ်ပါသည်။အပြစ်မဲ့ပြည်သူများအား ဖမ်းဆီးခြင်းအား ရှုံ့ချကြောင်း ၊အဖမ်းဆီးခံရသောသူမှာ မိမိတို့ တော်လှန်ရေးအဖွဲ့များနှင့် သက်ဆိုင်ခြင်းအလျဉ်းမရှိကြောင်း အသိပေးထုတ်ပြန်အပ်ပါသည်”ဟု Civil Guerrilla Force -YGN ဟုထုတ်ပြန်သည်။
ရဲဘော်များဆုတ်ခွာချိန်တွင် လမ်းပိတ်ခြင်းကြောင့် မေတ္တာရပ်ခံ၍ လမ်းတောင်းသော်လည်း ဖယ်မပေးသောကြောင့် စိတ်မကောင်းဖြစ်ရသည်ဟုလည်း ထုတ်ပြန်ချက်တွင် ဖော်ပြထားသည်။
ယင်းဖြစ်စဉ်တွင် ပစ်ခတ်မှုများကြောင့် လူတစ်ဦးသေဆုံးခဲ့ပြီး တစ်ဦးဖမ်းဆီးခံရသည်ဟု ယင်းနေရာအနီးတွင်နေထိုင်သူတစ်ဦးကပြောသော်လည်း People’s Spring အနေဖြင့် သီးသန့်အတည်ပြုနိုင်ခြင်းမရှိပေ။
ထို့ပြင် ပြည်သူများအနေဖြင့် စစ်ကောင်စီတပ်ဖွဲ့ဝင်များအနီးအနားသို့မသွားရန် ထပ်မံမေတ္တာရပ်ခံသည်။
