မကွေးတိုင်း ဆောမြို့နယ် ကျောက်ထုမြို့အခြေစိုက် စစ်ကောင်စီတပ်က ဒေသတွင်းရှိ ကျေးရွာအချို့အနီး လက်နက်ကြီးများဖြင့် အကြိမ်ကြိမ်ပစ်ခတ်တိုက်ခိုက်နေကြောင်း ဒေသခံများက ပြောသည်။
“အသံတွေတော့ ကြားနေရတာပဲ။ တိုက်ပွဲကတော့ မဖြစ်ဘူး။ ဟိုမှာ သင်တန်းဆင်းပွဲတွေရှိတယ် ထင်တယ်။ ရွာလေးတွေမှာ PDF သင်တန်းဆင်းပွဲရှိတာကို ထုတာလို့ထင်တယ်။ မလုပ်ရဲအောင် ပေါ့။ဒါက ကျွန်တော်ခန့်မှန်းတာပါ”ဟု ဆောဒေသခံတစ်ဦးက ပြောသည်။
ယနေ့ (ဧပြီ ၁၅ရက်) နံနက် ၉နာရီခွဲမှစ၍ ကျောက်ထုအမြောက်တပ်မှ မယ်လယ်ကုန်းနှင့် လှော်၀ အနီးတစ်၀ိုက်သို့ လက်နက်ကြီးဖြင့် ၁၄ချက် ပစ်ခတ်ခဲ့ကြောင်း မင်းတပ်မြို့နယ်ချင်းဒေသကာကွယ်ရေးတပ်(CDF)က ထုတ်ပြန်သည်။
ထိုသို့ ပစ်ခတ်တိုက်ခိုက်မှုကြောင့် အရပ်သားပြည်သူများထိခိုက်မှုရှိ၊မရှိ အခြေအနေကို ဖော်ပြမထား သော်လည်း ပြည်သူလူထုများ အထူးဂရုစိုက်ကြရန် တိုက်တွန်းထားသည်။ အဆိုပါ ကျောက်ထု ဒေသတွင် မင်းတပ် CDFတပ်များလည်း လှုပ်ရှားမှုရှိခဲ့ပြီး စစ်ကောင်စီတပ်ကို ခုခံတိုက်ခိုက်မှု ရှိခဲ့သည်။
Public Service Announcement
CDF တပ်ဖွဲ့များအနေဖြင့် ဆောနှင့်နယ်မြေချင်းဆက်နေသည့် ပေါက်မြို့နယ်အတွင်း စစ်ကြောင်းထိုးလာသည့် စစ်ကောင်စီတပ်များကိုလည်း ဒေသတွင်း ကာကွယ်ရေးတပ်များနှင့် ပူပေါင်းပြီး ခုခံတိုက်ခိုက်ခဲ့သည်။
