စစ်ကိုင်းတိုင်း တမူးမြို့ရှိ အကြမ်းဖက်စစ်ကောင်စီတပ်၏ လေးမိုင်ကင်းစခန်းကို မြို့ဒေသခံကာကွယ်ရေးတပ်များက ဝင်ရောက်တိုက်ခိုက်ရာ စစ်သား ခုနစ်ဦးသေဆုံးကြောင်း တမူး PDFမှ ရဲဘော်တစ်ဦးကပြောကြားသည်။
ယမန့်နေ(ဧပြီ ၁၄ ရက်)က အဆိုပါ လေးမိုင်ကင်းစခန်းအား ဝင်ရောက်တိုက်ခိုက်ရာတွင် တမူးမြို့ပြည်သူ့ကာကွယ်ရေးတပ် ၊တပ်ရင်း (၄)၊ ဗမာကျောင်းသားအဖွဲ့ ( Burmese student Organizations) နှင့် ABSDF (အောင်စစ်သည်) မဟာမိတ်တပ်ဖွဲ့ တို့က ပူးပေါင်းတိုက်ခိုက်ခဲ့ခြင်းဖြစ်သည်။
“မိမိတို့ပြည်သူ့ကာကွယ်ရေး တပ်များမှအထိခိုက်မရှိပြန်လဲ ဆုတ်ခွာနိုင်ခဲ့ပြီး တိုက်ပွဲသို့ စစ်ကောင်စီမှ တပ်ကူမပေးနိုင်ရေးအတွက် တပ်ရင်း(၂)မှ ကူညီလမ်းဖြတ်ပေးခဲ့ပါတယ်”ဟု တမူးမြို့ပြည်သူ့ကာကွယ်ရေးတပ်၊ တပ်ရင်း(၄)မှ တပ်သားတစ်ဦးက ၎င်း၏ လူမူကွန်ရက်တွင် ရေးသားထားသည်။
လက်ရှိတွင် တမူးဒေသအတွင်း တိုက်ပွဲများ ခက်စိပ်စိပ်ဖြစ်လာခြင်းကြောင့် လက်နက်ခဲယမ်းပြန်လည် ဖြည့် တင်းရန် လိုအပ်နေသောကြောင့် မိဘပြည်သူများ အနေဖြင့် ဖြည့်ဆည်းပေးကြရန်လည်း ဒေသခံကာကွယ်ရေးတပ်များက မေတ္တာရပ်ခံထားသည်။
Public Service Announcement
ထိုအတူ ဧပြီ ၁၃ ရက် သင်္ကြန်အကြိုနေ့တွင် စစ်ကောင်စီတပ်ဆွဲထားသည့် တမူးမြို့၊ မြေနီကုန်းကျောင်းကို ဒေသခံကာကွယ်ရေးတပ်များက ဝင်ရောက်တိုက်ခိုက်ခဲ့ရာ စစ်ကောင်စီ တပ်သား သုံးဦးနှင့် ပျူစောထီးတစ်ဦး သေဆုံးခဲ့သည်။
ပြည်သူများအနေဖြင့် သင်္ကြန်ကာလအတွင်း စစ်ကောင် စီနှင့်ပတ်သတ်သော နေရာများကိုလည်း ရှောင်ရှားကြရန် ဒေသခံကာကွယ်ရေးတပ်များက တိုက်တွန်းထားသည်။
