အကြမ်းဖက်စစ်ကောင်စီတပ်အား တိုက်ခိုက်စဥ် အရပ်သားတစ်ဦးသေဆုံးပြီး တစ်ဦးဒဏ်ရာရခဲ့သည့်ဖြစ်စဥ်အတွက် အနူးအညွတ်တောင်းပန်ကြောင်းနှင့် အလုံးစုံတာဝန်ယူဖြေရှင်းပေးသွားမည်ဟု YDF(Htilin) B-3( Shwe Son Nyo)က သတင်းထုတ်ပြန်သည်။
ယောဒေသပြည်သူ့ကာကွယ်ရေးတပ်ဖွဲ့ တပ်ရင်း(၃)၊ YDF HtilinB-3( Shwe Son Nyo)နှင့် အကြမ်းဖက်စစ်ကောင်စီတပ်သည် ထီးလင်းမြို့နယ် ရေမျက်နီရွာတွင် ယနေ့(ဧပြီ၁၈ရက်) နံနက်ပိုင်း၌ တိုက်ပွဲဖြစ်ခဲ့သည်။
YDF Htilin B-3( Shwe Son Nyo) ၏ အထူးကွန်မန်ဒိုအဖွဲ့မှ တပ်ဖွဲ့ဝင်ငါးဦးက စစ်ကောင်စီတပ်ကို တိုက်ခိုက်စဥ် အပြန်အလှန်ပစ်ခတ်မှုဖြစ်ပြီး အရပ်သားနှစ်ဦး ထိခိုက်ခဲ့ကာ တစ်ဦးသေဆုံးသွားခဲ့ခြင်း ဖြစ်သည်။
” အကြောင်းအမျိုးမျိုးကြောင့် ကျွန်တော်တို့ဖက်က သတ်မှတ်ထားခဲ့သောနေရာတွင် ထိတွေ့မှုမဖြစ်ပွားခဲ့ပဲ မထင်မှတ်သောနေရာတွင် ထိတွေ့မှုဖြစ်ပွားခဲ့ပြီးပြည်သူ လူထုကိုပါ အထိခိုက်ဒဏ်ရာရစေခဲ့မိပါသည်။အဆိုပါထိခိုက်မှုအတွက် ကျွန်တော်တို့ အဖွဲ့အစည်းအနေနဲ့ရော တပ်ဖွဲ့၀င် တစ်ဦးတစ်ယောက်ချင်းစီမှပါ အလွန်စိတ်မကောင်းဖြစ်ရပါသည်။ပြည်သူလူထု၏ ထိခိုက်မှုအားလုံးအတွက် ကျွန်တော်တို့ဖက်က အတတ်နိုင်ဆုံး အလုံးစုံ တာ၀န်ယူသွားပါမည်။ နောက်နောင် ထိုဖြစ်စဉ်မျိုး မဖြစ်ရအောင်လည်း အထူးဂရုစိုက်ပါမည်ဟု ကတိပြုလိုပါသည်”ဟု YDF Htilin B-3( Shwe Son Nyo)က ထုတ်ပြန်သည်။
Public Service Announcement
သေဆုံးသူအမျိုးသမီး၏ ဆွေမျိုတစ်ဦးက ယောဒေသအခြေစိုက် ပြည်သူ့ကာကွယ်ရေး အဖွဲ့များအနေဖြင့် ယနေ့ဖြစ်စဥ်အပေါ် သင်ခန်းစာယူစေလိုကြောင်းနှင့်နောက်နောင် ယခုကဲ့သို့ မဖြစ်စေလိုကြောင်းပြောသည်ဟု ယောဒေသတော်လှန်ရေးစာမျက်နှာက ရေးသားဖော်ပြထားသည်။
” ပြည်သူလူထုအတွက် ရပ်တည်သောအဖွဲ့အစည်းဟု မိမိကိုယ်ကိုခံယူထားပြီး ပြည်သူလူထုကို ထိခိုက်စေမှုအတွက် ကျွန်တော်တို့ စိတ်မကောင်းခြင်းများစွာဖြင့် အနူးအညွှတ်တောင်းပန်အပ်ပါသည်”ဟု YDF(ထီးလင်း)၏ တပ်ရင်းမှူးက တောင်းပန်ထားသည်။
အဆိုပါ တိုက်ခိုက်ခဲ့သည့်တိုက်ပွဲတွင် စစ်ကောင်စီရဲတစ်ဦးသေပြီး တစ်ဦးဒဏ်ရာ အပြင်းအထန်ရသွားခဲ့သည်။
အကြမ်းဖက်စစ်ကောင်စီစစ်ကြောင်းတစ်ကြောင်းသည် ယနေ့ညဘက်ပိုင်းတွင် ထီးလင်းမြို့နယ် ကျင်းရွာသို့ရောက်ရှိနေပြီး ည ၈နာရီခန့်မှစကာ ကျေးရွာကို မီးရှို့နေသည်ဟု ပြည်သူ့ကာကွယ်ရေးရဲဘော်တစ်ဦးကပြောသည်။
ဒေသခံပြည်သူများ လုံခြုံရေးအထူးဂရုစိုက်နေထိုင်ကြရန် YDF (ထီးလင်း)ရဲဘော်တစ်ဦးက ပြောသည်။
