ဒေါ်လာနဲ့ဝင်ငွေရရင် သတ်မှတ်ဈေးနှုန်းနဲ့တစ်ရက်အတွင်းရောင်းချရမယ်ဆိုတဲ့ အမိန့်ထုတ်ခဲ့တဲ့ စစ်ကောင်စီဟာ တစ်လအတွင်းမှာတင် အဲဒီအမိန့်ကို ပြန်ဖြေလျော့ပေးလိုက်ရပါတယ်။
ကနဦးက ပြည်ပကနေ ဒေါ်လာဝင်ငွေ ဝင်လာရင် တစ်ဒေါ်လာကို ၁၈၅၀ ကျပ်နဲ့ တစ်ရက်အတွင်းရောင်းချရမယ်လို့ စစ်ကောင်စီက ဧပြီလ ၃ ရက်က အမိန့်ထုတ်တာပါ။
ဒါပေမယ့် အမိန့်ထုတ်ပြီး ၁၇ ရက်အကြာမှာတင် အဲဒီအမိန့်ကနေ ကင်းလွတ်ခွင့်ပေးရမယ့် လူပုဂ္ဂိုလ်နဲ့ အဖွဲ့အစည်းတွေကို စစ်ကောင်စီဗဟိုဘဏ်က အသိပေးကြေညာပါတယ်။
စစ်ကောင်စီ ကင်းလွတ်ခွင့်ပေးလိုက်တာတွေကတော့ ပြည်တွင်းမှာလာရောက်လုပ်ကိုင်တဲ့ ရင်းနှီးမြှုပ်နှံမှု လုပ်ငန်းတွေ ၊ သံတမန်အသိုင်းအဝိုင်း ၊ကုလသမဂ္ဂအပါအဝင် အပြည်ပြည်ဆိုင်ရာအဖွဲ့အစည်းတွေမှာ လုပ်ကိုင်နေကြသူတွေ ၊လေကြောင်းလိုင်းတွေ ပါဝင်တာတွေ့ရပါတယ်။
ဒီလို ကင်းလွတ်ခွင့်ပေးရမယ့်သူတွေကို စာရွက်စာတမ်းအထောက်အထားတွေရယူပြီး စိစစ်ဖို့ကိုလည်း စစ်ကောင်စီရဲ့ ဗဟိုဘဏ်က ညွှန်ကြားပါသေးတယ်။