●ဖြေလျှော့မှုတွင်ပိုကုန်လုပ်ငန်းများ၊ သင်္ဘောသားများကဲ့သို့ဒေါ်လာရသောနိုင်ငံသားများ၊နိုင်ငံသားပိုင်လုပ်ငန်းများမပါဝင်
အာဏာသိမ်းစစ်ကောင်စီ၏ဗဟိုဘဏ်ဒုတိယဥက္ကဌသေနတ်ဖြင့်အပစ်ခံရပြီးနောက် ဒေါ်လာကို ကျပ်ငွေဖြင့် လွှဲပြောင်းရသည့် မူဝါဒကို စစ်ကောင်စီဗဟိုဘဏ်ကပြန်လည်ဖြေလျော့ပေးကြောင်း ဧပြီ ၂၀ ရက်တွင်ထုတ်ပြန်ကြေညာသည်။
စစ်ကောင်စီကနိုင်ငံခြားငွေများကိုရသည်နှင့် တစ်ရက်အတွင်း တစ်ဒေါ်လာကို ၁၈၅၀ကျပ်ဖြင့် လွှဲပြောင်းပေးရမည်ဖြစ်ပြီး မလဲလှယ်ပါကအရေးယူမည်ဟု ဧပြီ ၃ ရက် ထုတ်ပြန်ခဲ့သည်။ထိုသို့ထုတ်ပြန်ပြီး လေးရက်အကြာ ဧပြီ ၇ရက်တွင် ဗဟိုဘဏ် ဒုတိယဥက္ကဌ ဒေါ်သန်းသန်းဆွေမှာနေအိမ်တွင် သေနတ်ပစ်ခတ်ခံရသည်။သေနတ်ပစ်ခံရပြီး နှစ်ပါတ်အကြာတွင် စစ်ကောင်စီဘက်က ယခုကဲ့သို့ပြန်လည် ဖြေလျှော့ပေးခြင်းဖြစ်သည်။
ယခုဖြေလျှော့ပေးရာတွင် လုပ်ငန်း ၇ မျိုးပါဝင်ပြီး ၎င်းတို့၏ နိုင်ငံခြားငွေများကို ကျပ်ငွေပြောင်းလဲစရာမလိုအပ်ကြောင်း အကြမ်းဖက်စစ်ကောင်စီထိန်းချုပ်ထားသည့် ဗဟိုဘဏ်ကဆိုသည်။
Public Service Announcement
ထိုလုပ်ငန်း ၇ ခုမှ ရင်းနှီးမြှပ်နှံမူကော်မရှင် ခွင့်ပြုချက်ရနိုင်ငံခြားသားတိုက်ရိုက်ရင်းနှီးမြှပ်နှံမှုလုပ်ငန်းများ၊ အထူးစီးပွားရေးဇုန်ရှိရင်းနှီးမြှပ်နှံမှုလုပ်ငန်းများ၊ သံတမန်လုပ်ငန်း၊ ကုလသမဂ္ဂအဖွဲ့အစည်းများနှင့်ပြည်ပနိုင်ငံများမှလာရောက်ကူညီပေးနေသည့် ဖွံဖြိုးရေးအေဂျင်စီများ၊ JICAကဲ့သို့ INGOအဖွဲ့အစည်းများတွင်လုပ်ကိုင်နေသော နိုင်ငံခြားသားဝန်ထမ်းများ နှင့် အပြည်ပြည်ဆိုင်ရာလေကြောင်းလိုင်းများဖြစ်သည်။
သို့သော်ထိုလုပ်ငန်း ၇ မျိုးမှာ နိုင်ငံခြားငွေနှင့်ပတ်သတ်သည့် ဆောင်ရွက်ချက်အားလုံးကို မှတ်တမ်းတင်ထားပြီစစ်ကောင်စီဗဟိုဘဏ်ကို တင်ပြရမည်ဟုပါရှိသည်။
ထိုကြောင့် ပို့ကုန်သွင်းကုန်လုပ်ငန်းများကဲ့သို့ နိုင်ငံခြားငွေအဓိကရှာဖွေပေးသောလုပ်ငန်းများ၊လက်ခစားအထည်ချုပ်လုပ်ငန်းများ၊သဘော်သားများ၊ပြည်တွင်းရှိနိုင်ငံတကာအဖွဲ့အစည်းများ ၊NGO များတွင်အလုပ်လုပ်သော မြန်မာနိုင်ငံသားများ စသောဒေါ်လာရသောလုပ်ငန်းများ၊နိုင်ငံသားများမှာမူ ပြင်ပတွင် ဒေါ်လာဈေးမည်မျှပေါက်စေကာမူ စစ်ကောင်စီ၏ ဗဟိုဘဏ်တွင် တစ်ဒေါ်လာ ၁၈၅၀ ကျပ်ဖြင့်ရောင်းပေးရဦးမည်ဖြစ်သည်။
“မျှော်လင့်ထားတဲ့အတိုင်းပါပဲ။ နိုင်ငံခြားသားပိုင်လုပ်ငန်းဆိုရင် မထိရဲ မတို့ရဲဘူး။ နိုင်ငံသားတွေဆိုရင် အနိုင်ကျင့်တာဘဲ။ ဒါက အာဏာရှင်အဆက်ဆက်ပါပဲ”ဟု စီးပွားရေးလုပ်ငန်းရှင်တစ်ဦးကပြောသည်။
ရန်ကုန်အခြေစိုက် ပို့ကုန်လုပ်ငန်းရှင်တစ်ဦးကလည်း“စစ်တပ်က ထုတ်တဲ့ညွန်ကြားချက်က နိုင်ငံသားတွေကို အနိုင်ကျင့်ပြီး လုပ်ချင်သလို လုပ်နေတာ။ နောက်ပြီး အခုတစ်မျိုးတော်ကြာတစ်မျိုးနဲ့ ။ ပြည်တွင်းလုပ်ငန်းတွေ ဘယ်လိုမှ ဆက်လုပ်ဖို့ ဖြစ်နိုင်မှာမဟုတ်တော့ဘူး”ဟုပြောသည်။
စစ်ကောင်စီ၏ နိုင်ငံခြားငွေ ထိန်းချုပ်မှုကို ဂျပန်၊ စင်ကာပူ၊ ဥရောပသမဂ္ဂနိုင်ငံများနှင့် ပြည်တွင်းရှိ နိုင်ငံခြားစီးပွားရေးလုပ်ငန်းများက ကန့်ကွက်ခဲ့သည်။
