ကေအဲန်ယူ-ဒူးပလာယာခရိုင် နို့တကောမြို့နယ်အတွင်းမှာရှိတဲ့ ကွီးလယ်တဲရွာနဲ့ ကွီးလယ်ရွာသစ်ကျေးရွာတို့ကို စစ်ကောင်စီတပ်က ဒီကနေ့ညနေပိုင်းမှာ ဗုံးကြဲတိုက်ခိုက်ခဲ့တယ်လို့ ဒူးပလာယာခရိုင်က သတင်းထုတ်ပြန်ထားပါတယ်။
ဒီကနေ့ညနေ ငါးနာရီအချိန်ခန့်က တပ်မဟာ ၆ နယ်မြေဖြစ်တဲ့ ကွီးလယ်တဲနဲ့ ကွီးလယ်ရွာသစ် ကျေးရွာထဲကို စစ်ကောင်စီတပ်က လေယာဉ်နှစ်စီးနဲ့ ဗုံးငါးလုံးကြဲချခဲ့တယ်လို့ထုတ်ပြန်ချက်မှာ ဖော်ပြထားပါတယ်။
တစ်ဆက်တည်းမှာပဲ ထီးသဘလူခီးကျေးရွာမှာလည်း စစ်ကောင်စီတပ်က လေယာဉ်ဖြင့် ဗုံးသုံးလုံး ထပ်မံကြဲချခဲ့တယ်လို့ မြေပြင်သတင်းပေးပို့ချက်အရ သိရကြောင်း ဒူးပလာယာခရိုင်က ဆိုထားပါတယ်။
စစ်ကောင်စီရဲ့ကွီးလယ်တဲ စစ်ဆင်ရေးခြေကုပ်စခန်းကို ကေအဲန်ယူက ရေဖြတ်တောက်ထားတဲ့အတွက် ကျေးရွာတွေအပေါ် စစ်ကောင်စီက ဖျက်ဆီးအောင်လုပ်ဆောင်မယ်လို့ ခြိမ်းခြောက်ပြောဆိုထားပြီး အခုလို ဗုံးကြဲတိုက်ခိုက်မှုတွေ လုပ်ဆောင်လာတာဖြစ်ပါတယ်။
Public Service Announcement
ဒါအပြင် ဒီကနေ့ညပိုင်းမှာလည်း တပ်မဟာ ၆ နယ်မြေ လေးကေကော်ဒေသအနီးက ဖလူး သေ့ဘောဘိုးကျေးရွာဘက်မှာ KNLA ပူးပေါင်းအဖွဲ့နဲ့ စစ်ကောင်စီတပ်တို့ကြား ထိတွေ့တိုက်ပွဲတွေ ဖြစ်ပွါးနေတယ်လို့ သိရပါတယ်။
