နိုင်ငံဘဏ္ဍာငွေ ထိခိုက်နစ်နာဆုံးရှုံးရတယ်ဆိုပြီး NLD အစိုးရ လက်ထက် ပြည်ထောင်စုအဆင့် ဝန်ကြီး ၂ ဦးကို စစ်ကောင်စီက အဂတိပုဒ်မတွေနဲ့ ဧပြီလ ၂၂ ရက်က ထောင်ချလိုက်ပါတယ်။
မြန်မာနိုင်ငံ ရင်းနှီးမြှုပ်နှံမှု ကော်မရှင်ဥက္ကဋ္ဌ ဝန်ကြီး ဦးသောင်းထွန်းနဲ့ ဆောက်လုပ်ရေးဒုဝန်ကြီး ဦးကျော်လင်းတို့ကို မန္တလေးမှာထောင်ချလိုက်တာပါ။
ဝန်ကြီးဦးသောင်းထွန်းဟာ တင်ဒါမခေါ်ဘဲ အသိကုမ္ပဏီကို မြေဌားရမ်းရာမှာ လုပ်ထုံးလုပ်နည်းကို လိုက်နာမှုမရှိတာကြောင့် အမေရိကန်ဒေါ်လာ ၉ သန်းကျော် နစ်နာမှု ဖြစ်ခဲ့တယ်လို့စစ်ကောင်စီကစွပ်စွဲထားပါတယ်။
ဒါကြောင့် အဂတိပုဒ်မနဲ့ အလုပ်နဲ့ထောင်ဒဏ် ၉ နှစ်ချလိုက်တယ်လို့ သိရပါတယ်။
ဆောက်လုပ်ရေးဒုဝန်ကြီး ဦးကျော်လင်းကိုလည်း ဘဏ္ဍာရေးစည်းမျည်း လိုက်နာမှုမရှိတာ ၊ ဆောက်လုပ်ရေးကုမ္ပဏီတွေထံက ပိုက်ဆံတောင်းတယ်ဆိုကာ အဂတိပုဒ်မနဲ့ ထောင်ဒဏ် နှစ် ၂၀ ချလိုက်တာပါ။
ဒုဝန်ကြီး ဦးကျော်လင်းနဲ့အတူ ဆောက်လုပ်ရေးဝန်ကြီးဌာနက ညွှန်ကြားရေးမှူးချုပ် ၃ ဦးကိုလည်းစစ်ကောင်စီက ထောင်ဒဏ်အသီးသီးချခဲ့ပါတယ်။