ရှမ်း-ကယားနယ်စပ် မိုးဗြဲမြို့အထွက်တစ်နေရာတွင် စစ်ကောင်စီတပ်ကို ယမန်နေ့ညပိုင်းက ပြောက်ကျားစနစ်ဖြင့် တိုက်ခိုက်ခဲ့ရာ စစ်ကောင်စီတပ်မှ ထိခိုက်မှုရှိခဲ့ကြောင်း ကရင်နီအမျိုးသားများကာကွယ်ရေးတပ်(KNDF) တပ်ရင်း(၃)က သတင်းထုတ်ပြန်သည်။
ဧပြီ ၂၃ရက် သန်းခေါင်ယံအချိန်တွင် ပင်လောင်းဖက်မှ ဒီမောဆိုမြို့ဘက်သို့ ဆင်းလာသော အကြမ်းဖက်စစ်ကောင်စီစစ်ကြောင်းကို တိုက်ခိုက်ခဲ့ခြင်းဖြစ်သည်ဟုဆိုသည်။
ပင်လောင်းမှလာသည့် စစ်ကောင်စီတပ်၏ စစ်ကားအစီး၃၀ခန့်သည် မိုးဗြဲရှိ ခမရ-၄၂၂ တပ်သို့ ယမန်နေ့ည ၈နာရီခွဲကျော်တွင် ဝင်ရောက်လာပြီး ထိုမှတစ်ဆင့် မိုးဗြဲ-ဝါရီဆူးပလိုင်-ဒီး မော့ဆို လမ်းကြောဖက်သို့ ခြေလျင်ထွက်လာစဉ် KNDFက တိုက်ခိုက်ခဲ့ခြင်းဖြစ်သည်ဟု ဖော်ပြထားသည်။
တိုက်ပွဲမှာ မိနစ်၂၀ခန့် ကြာမြင့်ခဲ့ပြီး အကြမ်းဖက်စစ်ကောင်စီဘက်က အနည်းဆုံးသုံးဦးခန့် ပြင်းထန်စွာ ထိခိုက်ဒဏ်ရာရရှိခဲ့ပြီး KNDF တပ်ရင်း(၃)မှ ရဲဘော်များမှာ အထိအခိုက်မရှိဟု ဆိုသည်။
အကြမ်းဖက်စစ်ကောင်စီတပ် ခမရ-၄၂၂မှ လက်နက် ကြီးများဖြင့် ရမ်းသမ်းပစ်ခတ်ခဲ့ကြောင်း၊လက်နက်အင်အားမမျှ၍ ပြန်လည်ဆုတ်ခွာခဲ့ရကြောင်း ဖော်ပြထားသည်။